Знаёмства з творчасцю Івана Мележа
У бібліятэках сістэмы адбыліся мерапрыемствы, прысвечаныя 105-годдзю з дня нараджэння народнага пісьменніка Беларусі Івана Мележа, у творах якого жыве і пераліваецца ўсімі фарбамі самабытны свет беларускага народа.
У Германавіцкай сельскай бібліятэцы-філіяле ў межах праекту ”Кожная пятніца – роднае, сваё!“ адбылося знаёмства з кніжнай выставай ”Ён жыў лёсам людзей на балоце“.
Бібліятэкар Дворнаўскай сельскай бібліятэкі-філіяла правяла агляд літаратуры ”У імя будучыні і жыцця“.
У Буеўшчынскай сельскай бібліятэцы-клубе-філіяле адбылася літаратурная гадзіна ”З глыбінь народнага жыцця“.
Напачатку бібліятэкар Наталля Кандрацьева распавяла ўдзельнікам, што пачатак шматлікім выданням мележаўскіх твораў паклала невялікая кніга з простай і па-свойму шмат значнай назвай ”У завіруху“. Яна выразна засведчыла таленавітасць аўтара і была прынятая прыхільна. Вяршыняй творчасці І.Мележа з’яўляецца ”Палеская хроніка“, якая была і застаецца адным з вызначальных твораў беларускай літаратуры.
Затым удзельнікі даведаліся, што імем Івана Мележа названы школы ў в. Глінішча, бібліятэка ў Гомелі, цеплаход, Мозырскі драматычны тэатр. У вёсцы Глінішча адкрыты літаратурны музей. У 1980 годзе ўстаноўлена Літаратурная прэмія Саюза пісьменнікаў Беларусі імя Івана Мележа.
Напрыканцы мерапрыемства бібліятэкар пазнаеміла ўдзельнікаў з кніжнай выставай па творчасці пісьменніка.
Некаторыя з удзельнікаў мерапрыемства ўзялі пачытаць раманы Івана Мележа, а некаторыя – і перачытаць.
