ЖЫЦЦЁ ДЗЕЛЯ АЙЧЫНЫ
Для навучэнцаў 9 ”В“ класа УА ”Сярэдняй школы № 1 г.п. Шаркаўшчына“ ў дзіцячай бібліятэцы прайшла гутарка ”Жыццё дзеля Айчыны“.
Юнакі і дзяўчаты здзейснілі экскурс у гісторыю ВКЛ і пазнаёміліся з выдатнай асобай з магутнага роду Сапегаў – Львом Сапегай.
Бібліятэкар распавяла пра жыццё і дзейнасць гэтай гістарычнай асобы, вядомага палітычнага дзеяча, вялікага гетмана, дыпламата, галоўнакамандуючага войскамі ВКЛ, які ўдзельнічаў у вайне са Швецыяй. Жыццё Льва Сапегі была звязана з многімі гарадамі і мястэчкамі Беларусі, у кожным з іх ён пакінуў аб сабе сляды, над якімі не падуладны час. Замак у Гальшанах, Быхаўскі замак, палацавы комплекс у Ружанах, шматлікія касцёлы – гэта ўнікальныя куткі Беларусі, бо прадстаўнікі роду Сапегаў унеслі вялікі ўклад у развіццё беларускай культуры.
Прагучалі цікавыя факты пра ініцыятара стварэння Статута (1588 г.) ВКЛ, які замацаваў аўтаномію княства і абвясціў беларускую мову дзяржаўнай і дзейнічаў на тэрыторыі Беларусі, Літвы і правабярэжнай Украіны да ХІХ стагоддзя. Па сутнасці, гэта і была першая ў Еўропе Канстытуцыя. Па запісаных у Статуце законах беларусы жылі аж 254 гады. Дзякаючы дзейнасці Льва Сапегі, наша дзяржава ў складаных гістарычных абставінах не толькі захавала незалежнасць, але і перажыла перыяд гаспадарчага і культурнага росквіту. Гэта час гісторыкі называюць ”Эпохай Сапегі“. Відыяматэрыялы, якія былі прадэманстраваны у час размовы, выклікалі цікавасць і адкрылі шмат невядомага для вучняў.
