ЖЫЦЦЁ, БАГАТАЕ НА ТВОРЧАСЦЬ
Напрыканцы ліпеня ў Лужкаўскай сельскай бібліятэцы-філіяле адбылася літаратурна-музычная гасцёўня ”Жыццё, багатае на творчасць“, якая з гонарам адчыніла скарбонку талентаў Шаркаўшчынскай зямлі. На гэты раз шаноўнымі гасцямі мерапрыемства сталі ўдзельнікі народнага калектыву літаратурнай творчасці ”Світанак“. Мастакі слова роднай зямлі – людзі рознага ўзросту, розных прафесій і захапленняў, але пры гэтым яны незвычайна творчыя, таленавітыя, яркія і цікавыя. Кожны са ”світанкаўцаў“ паўстае перад аматарамі творчасці ў сваім, толькі яму ўласцівым амплуа. Поспех любой справы не магчым без годнага прафесіянала, актыўнага, аўтарытэтнага і вынаходлівага. Гэтыя рысы як нельга лепш падыходзяць да творчай натуры Алы Клакоўскай, кіраўніка народнага калектыва літаратурнай творчасці, а яшчэ яе шыкоўнае выкананне песень на вершы ”світанкаўцаў“ і іншых аўтараў нікога не пакідаюць раўнадушным.
Паэтычны голас Міледзія Кукуця гучаў на сцэнічных пляцоўках розных узроўняў, лепшыя паэтычныя і празаічныя творы аўтара пабачылі свет на старонках раёнага, абласнога і рэспубліканскага друку. А непасрэдная сустрэча з літаратурным мэтрам на лужкаўскай зямлі ва ўсіх выклікала замілаванне і радасць.
Творы Віктара Лагуна адлюстроўваюць біяграфію яго сэрца, якое не можа ахаладнець да роднага краю, да ўспамінаў з маленства і ўспрымання рэалій сучаснасці, у тым ліку і цікавых, заўзятых момантаў з прафесінага свету электразабеспячэння. Апошнім часам у дзейнасці творцы вядзецца адказная і важная праца па пошуку, сістэматызацыі і друку матэрыялаў па гісторыі раённых электрычных сетак, аб чым больш дэталёва і расказаў сам аўтар.
Аматары мастацкага слова яшчэ з’яўляюцца і самадзейымі паэтамі і кампазітарамі, якія натхнённа працуюць у цесным творчым тандэме. І менавіта тут ідзе размова пра Ірыну Буднік і Івана Гарбачонка, для якіх музыка – паэзія душы. Ірына Буднік - жанчына з творчым запалам і іскрынкай у душы ўжо даўно заявіла сябе як паэт-песеннік, а спалучэнне яе кранальных вершаў і музыкі ў чароўныя песні, выклікалі трапяткія пачуцці, абудзілі душу і сэрца прысутных.
У сваіх музычных кампазіцыях самадзейны кампазітар і таленавіты музыкант Іван Гарбачонак удала спалучае свой меладычны барытон, якія многія называць ”залатым голасам Шаркаўшчынскага краю“, з тонкім лірызмам і яскравасцю вобразаў вершаваных радкоў, што захапляе і знаходзіць водгук удзячных слухачоў.
Як сапраўдная жанчына, Аліна Шынкевіч у сваіх вершах заўсёды розная, але пастаянна дорыць любоў і цеплыню, тонка адчувае і перадае ўсё шматуладдзе пачуццяў. Радкі яе вершаў напісаныя ад шчырага сэрца, ніколі не трацяць першароднай свежасці, бо яны пра самае дарагое і мілае, што і змаглі адчуць прысутныя.
Пачынаючая маладая паэтка Эмілія Красавіна ў сваёй творчасці імкнецца выразіць асабісты погляд на свет, пранізаны юнацкімі марамі і філасофскімі разважаннямі. Хоць ў ”Світанку“ яна зусім нядаўна, але ўжо мае больш двух дзясяткаў уласных вершаў і найбольш цікавыя на яе погляд, прагучалі падчас сустрэчы.
Літратурна-музычная гасцёўня сабрала шмат аматараў мастацкага слова, прыхільнікаў музычных твораў і прайшла ў цёплай і сяроўскай атмасферы.
