Выніковая нарада бібліятэкараў
20 лютага на базе дзіцячай бібліятэкі адбылася выніковая нарада бібліятэчных работнікаў дзяржаўнай ўстановы культуры ”Шаркаўшчынская цэнтралізаваная бібліятэчная сістэма“.
У сваім выступленні дырэктар ЦБС Таццяна Міхайлаўна Райчонак падвяла вынікі работы сістэмы, падрабязна спынілася на кожным з напрамкаў работы, робячы акцэнты на дасягненнях 2024 года.
Аб важнейшых задачах на Год добраўпарадкавання распавяла загадчык сектара бібліятэчнага маркетынгу і сацыякультурнай дзейнасці Ганна Мікалаеўна Гарлуковіч.
Падчас нарады адбылося падвядзенне вынікаў творчых конкурсаў ”Зімовыя фантазіі“ і ”Памяць без тэрміну даўнасці“.
Сярод пераможцаў конкурсу на лепшы сцэнарый патрыятычнага напрамку ”Памяць без тэрміну даўнасці“ ўзнагароды атрымалі: калектыў аддзела абслугоўвання і інфармацыі цэнтральной раённай бібліятэкі (загадчык аддзела Т. І. Гагалінская), калектыў Лужкаўскай сельскай бібліятэкі-філіяла (загадчык І. І. Машара), Т. К. Пугаўка, бібліятэкар Велікасельскай сельскай бібліятэкі-філіяла і В. У. Абрамава, бібліятэкар Радзюкоўскай сельскай бібліятэкі-філіяла.
Напярэдадні навагодніх святаў бібліятэчныя работнікі ўпрыгожвалі свае працоўныя месцы, кабінеты, тым самым, ствараючы атмасферу навагодняга чараўніцтва. Лепшыя з лепшых за ўдзел у конкурсе ”Зімовыя фантазіі“ атрымалі ў гэты дзень узнагароды: калектыў дзіцячай бібліятэкі-філіяла (загадчык Т. Л. Брандзіна), А. У. Пагарэлава, бібліятэкар Васюкоўскай сельскай бібліятэкі-філіяла, Л. І. Мядзелец, бібліятэкар Каўшэлеўскай сельскай бібліятэкі-філіяла і Г. І. Лаўрыновіч, бібліятэкар Іёдскай сельскай бібліятэкі-філіяла.
Пасля падвядзення вынікаў удзельнікі нарады пазнаёміліся з палажэннем аб правядзенні конкурса ”Майстры беларускага слова“ на лепшы рэкамендацыйны спіс літаратуры па творчасці беларускіх пісьменнікаў-юбіляраў 2025 года.
Затым бібліятэчныя работнікі сталі першымі ў Шаркаўшчынскім раёне гледачамі фільма ”Обитель святой Ефросинии“.
У другой частцы нарады намеснік дырэктара ДУК ”Шаркаўшчынская ЦБС“ Вікторыя Уладзіміраўна Шышко з бібліятэчнымі работнікамі правяла праверку ведаў па авалодванню Нацыянальным механізмам аказання дапамогі непаўналетнім, якія пацярпелі ад сэксуальнага гвалту. У ходзе праверкі работнікам прапаноўвалася выбраць правільны варыянт адказу, які тычыцца механізму. Паўторна раздадзена ”Рэгіянальная карта Віцебскай вобласці“.
Затым бібліятэкары пазнаёміліся з метадычнай кансультацыяй па састаўленню і афармленню рэкамендацыйнага спіса літаратуры.
Напрыканцы нарады адбыўся паэтычны калейдаскоп ”Гучы, мая родная мова, як срэбны званочак“, прымеркаваны да Міжнароднага дня роднай мовы. Бібліятэкары з задавальненнем чыталі вершы на роднай мове ўдзельнікаў народнага калектыву літаратурнай творчасці ”Світанак“.
