Вынікі конкурсу
Краязнаўства – адзін з галоўных накірункаў дзейнасці Лужкаўскай сельскай бібліятэкі. Сабраць і захаваць для будучых пакаленняў багатую матэрыяльную і духоўную культуру краю, унікальныя матэрыялы, сістэматызаваць іх, зрабіць даступнымі кожнаму карыстальніку – вось сэнс краязнаўчай дзейнасці Лужкаўскай сельскай бібліятэкі.
На працягу некалькіх год калектыў бібліятэкі займаўся пошукава-даследчай працай па гісторыі лужкаўскай зямлі, у выніку якой быў створаны бібліяграфічны паказальнік ”Тут карані, адсюль вытокі. Лужкі: погляд праз стагоддзі“. Лiтаратура, якая змяшчаецца ў бібліяграфічным паказальніку, дапаможа ўсім жадаючым глыбей пазнаць родны край, дасць магчымасць выкарыстаць яе багаццi ў навуковай, вытворчай, педагагiчнай i культурна-асветніцкай рабоце. У якасці дадаткаў да паказальніка змешчаны краязнаўчыя выданні.
У мастацка-публіцыстычнае выданне ”Мястэчка з мілай назваю Лужкі“ ўключаны нарысы аб адважнай партызанцы-разведчыцы Анастасіі Бельскай і рацэ Мнюта, вершы і ўспаміны аб родным краі мясцовых аўтараў.
Заслугоўвае ўвагі і варты таго, каб яго ўбачылі нашы землякі, фотаальбом ”Рэтрапогляд. Лужкі ў аб’ектыве ХХ стагоддзя“, бо мастацкім позіркам фатографа тых даўніх часоў у аб’ектыве фотакамеры захавана жыццё самых звычайных людзей мястэчка Лужкі, наша памяць, наша гісторыя.
Калектыў бібліятэкі распрацаваў і выдаў шэраг дапаможнікаў малых форм: буклеты ”Помнікі вайны“, ”Святыні роднага краю“, інфармацыйныя выданні ”Выпрабаванне лёсам“ (аб гісторыі і жыцці яўрэйскага насельніцтва ў мястэчку Лужкі), ”Памяць застанецца ў песнях“ (аб жыцці і творчым шляху Г.І. Цітовіча), ”Урач ад Бога“ (аб галоўным урачу Лужкаўскай бальніцы Т.Ц. Захарэвіч).
Краязнаўчы матэрыял быў дасланы да ўдзелу ў XXXII Рэспубліканскім конкурсе ”Бібліятэка – асяродак нацыянальнай культуры“.
Радуе тое, што работа калектыву Лужкаўскай сельскай бібліятэкі была прадстаўлена да ўзнагароджання Дыпломам II ступені Міністэрства культуры Рэспублікі Беларусь ў намінацыі ”За пошукавую і даследчую працу“ і грашовай прэміяй.
Калектыў ДУК ”Шаркаўшчынская ЦБС“ віншуе загадчыцу бібліятэкі Ірыну Машара і бібліятэкара Лену Гугалінскую з перамогай у конкурсе і жадае новых дасягненняў, поспехаў, сямейнай утульнасці, пашаны ў працы і дастатку ў жыцці!
