Вялікдзень у бібліятэках
20 красавіка праваслаўныя і католікі разам адзначылі галоўнае хрысціянскае свята – Пасху, якая лічыцца святам святаў і ўрачыстасцю ўрачыстасцей.
У цэнтральнай раённай бібліятэцы і Іёдскай сельскай бібліятэцы з гэтай нагоды адбыліся цікавыя мерапрыемствы, падчас якіх вялася гаворка аб значэнні Пасхі для кожнага чалавека, незалежна ад веравызнання, аб традыцыях святкавання Вялікадня.
У ходзе мерапрыемстваў было адзначана, што адным з атрыбутаў велікодных дзён з’яўляецца фарбаванае (пераважна чырвонае) яйка. Таму прыгадалі біблейскае паданне аб традыцыі фарбаваць на Вялікдзень яйкі, як сімвал кругазвароту і бясконцасці жыцця.
Затым удзельнікі мерапрыемства, якое ладзілася ў цэнтральнай раённай бібліятэцы, прыгадалі, што адным з шырока распаўсюджаных велікодных забаў былі гульні з выкарыстаннем фарбаваных яек. Падчас мерапрыемства з задавальненнем пагулялі ў гульні ”Чыё яйка будзе даўжэй круціцца?“, ”Чыё яйка мацнейшае?“.
Галіна Лаўрыновіч, бібліятэкар Іёдскай сельскай бібліятэкі-філіяла, падчас мерапрыемства для юных наведвальнікаў правяла майстар-клас на роспісу велікодных яек.
Людміла Ананіч, бібліятэкар Більдзюгскай сельскай бібліятэкі-філіяла, прыняла ўдзел у цікавым і радасным велікодным абрадзе, калі яна разам з супрацоўнікамі сельскага Дома культуры наведваліся ў двары аднавяскоўцаў і выказвалі шчырыя пажаданнні гаспадарам, а таксама спявалі віншавальныя валачобныя песні.
