Вучымся беларускасці ў класікаў
У лютым бібліятэкары цэнтральнай раённай бібліятэкі Зоя Сцепаненкава і Іна Суднік на бібліёбусе (бібліятэцы на колах) наведаліся да жыхароў вёсак Кубелеўшчына, Наваселле, Болкалы і Балтрамеі.
Падчас візіту аматары чытання мелі магчымасць не толькі абмяняць літаратуру, але і стаць ўдзельнікамі патрыятычнай акцыі ”Вучымся беларускасці ў класікаў“, прымеркаваную да Міжнароднага дня роднай мовы. Звяртаючыся да ўдзельнікаў акцыі, бібліятэкар Зоя Сцепаненкава адзначыла, што Янка Купала, Якуб Колас, Максім Багдановіч – гэта сапраўды народныя паэты, без якіх немагчыма ўявіць сабе беларускую літаратуру і навогул культуру нашага народа. Яны пранеслі праз усё жыццё высокія ідэі гуманізму, дабра і справядлівасці, аддалі народу свой талент, сваю душу і сэрца. Як доказ таму былі прадэкламаваны радкі іх цудоўных вершаў: ”Зорка Венера“ Максіма Багдановіча, ”Спадчына“ Янкі Купалы, ”О, край родны, край прыгожы!“ Якуба Коласа і інш.
Напрыканцы мерапрыемства бібліятэкар Іна Суднік нагадала прысутным, што сёння гонар і абавязак усіх нас – шанаваць родную мову, абараняць яе ад ворагаў і крыўдзіцеляў, бо нацыя толькі тады будзе жыць і развівацца, калі кожнае наступнае пакаленне будзе зберагаць нацыянальныя традыцыі і родную мову!
