Вітаем. Віншуем. Жадаем!
У Германавіцкай сельскай бібліятэцы адбылася гадзіна-віншаванне ”Вітаем. Віншуем. Жадаем!“, прымеркаваная да 65-гадовага юбілею Ірыны Віктараўны Абламавай, якая больш за 30 гадоў служыла Яе Вялікасці Кнізе.
Падчас мерапрыемства ў адрас юбіляркі было выказана шмат цёплых слоў ад работнікаў Германавіцкага Цэнтра культуры і народнай творчасці, чытачоў і аматараў літаратуры, прафкама пярвічнай прафсаюзнай арганізацыі ДУК ”Шаркаўшчынская ЦБС“.
У ходзе мерапрыемства І.В.Абламава прыгадала цікавыя моманты працоўнай дзейнасці. Яна адзначыла, што шмат мерапрыемстваў рыхтавалася да Тыдня дзіцячай і юнацкай кнігі, плённа працаваў літаратурны клуб, які дапамагаў бібліятэкару ў падрыхтоўцы і правядзенні мерапрыемстваў.
Найбольш значнай і складанай падзеяй стаў пераезд Германавіцкай бібліятэкі ў 2006 годзе ў новае месца – капітальна адрамантаваны будынак у цэнтры аграгарадка, дзе дагэтуль знаходзіліся Цэнтр культуры і народнай творчасці і кантора мясцовага сельгаспадпрыемства.
Ірына Віктраўна, як прафесіянал бібліятэчнай справы, цешыцца таму, што ёсць людзі, якія і сёння шмат чытаюць, што тэлевізар і інтэрнэт не замянілі друкаваныя выданні. Нават, знаходзячыся на заслужаным адпачынку, І.В. Абламава не ўяўляе сябе без кнігі і чытання.
Калектыў ДУК ”Шаркаўшчынская ЦБС“ шчыра віншуе Ірыну Віктараўну з нагоды юбілею і жадае вялікага жыццёвага цярпення, усялякіх зямных выгод і ўсяго толькі самага добрага, няхай здароўе не падводзіць, а шчасце апынецца бясконцым!
