Віншаванні з 85-гадовым юбілеем
12 красавіка ветэран бібліятэчнай справы Ларыса Іванаўна Марковіч адзначыла свой 85-гадовы юбілей.
Яна нарадзілася на Ушаччыне, а пасля таго як разам з мужам у 1968 годзе пераехала ў наш раён, тры дзясяткі гадоў адпрацавала ў сферы культуры Шаркаўшчынскага раёна: з’яўлялася бібліятэкарам дзіцячай бібліятэкі, інспектарам аддзела культуры, загадчыцай аддзела камплектавання, апрацоўкі і захавання фондаў. З 1990 па 1995 гады ўзначальвала Шаркаўшчынскую цэнтралізаваную бібліятэчную сістэму.
Ад імя кіраўніцтва раёна Ларысу Іванаўну з юбілеем павіншавалі начальнік арганізацыйна-кадравага аддзелу В. В. Клімза, загадчык сектара культуры І. М. Шынкевіч, старшыня раённага Савета ветэранаў І. Г. Міхалёнак. Цёплыя і шчырыя віншаванні з пажаданнямі моцнага здароўя, дабрабыту і доўгіх гадоў жыцця прагучалі і ад імя калег Л. І. Марковіч старшыні пярвічнай прафсаюзнай арганізацыі ДУК ”Шаркаўшчынская цэнтралізаваная бібліятэчная сістэма“ В. А. Мілянцей і М. Г. Сушко.
Дэлегацыя гасцей уручыла юбіляру Падзяку старшыні райвыканкама за шматгадовую добрасумленную працу, значны асабісты ўклад у развіццё бібліятэчнай справы раёна і ў сувязі з юбілеем, грашовую прэмію, кветкі і падарунак.
