Вечар-ушанаванне матуль
У рамках Тыдня бацькоўскай любові ў ДУК ”Шаркаўшчынская цэнтралізаваная бібліятэчная сістэма“ адбыўся вечар-ушанаванне матуль ”Мама… чьё сердце не имеет границ“, арганізатарам якога выступіла старшыня пярвічнай прафсаюзнай арганізацыі Вера Мілянцей.
На пачатку мерапрыемства ўсіх матуль-працаўніц сістэмы яна павіншавала са святам і адзначыла, што быць маці – значыць адкрываць у сабе лепшыя чалавечыя якасці: дабрыню, спагаду, самаадданасць, сумленнасць.
Ушанаванне матуль распачалося з самай маладой маці – Анастасіі Андрэевай, якая выхоўвае двух маленькіх дзетак: сынка Даніка і дачушку Кацярынку.
Уразілі сваімі адказамі матулі на пытанні аб дзетках-школьніках. Ганна Гарлуковіч, Таццяна Гагалінская і Жана Вуглова ў курсе ўсіх школьных падзей сваіх сынкоў.
У матуль, якім прысуджана званне ”Мама – добрае сэрца“, дзеці ўжо дарослыя, але для Тамары Паляк, Святланы Базарэвіч, Святланы Сташкевіч і Іны Суднік іх крывіначкі – самыя лепшыя, прыгожыя і любімыя, за іх заўсёды трывожышся і перажываеш.
У калектыве працуюць і матулі, якія захапляюцца рукадзелем і сваімі рукамі ствараюць неверагодныя шэдэўры. Падчас мерапрыемства майстрыцам было прапанавана за некалькі хвілін пры дапамозе іголкі, ніткі і макарон стварыць якое-небудзь упрыгожванне. Таццяне Райчонак, Веры Мілянцей і Алене Пагарэлавай прысуджана званне ”Мама ”залатыя рукі“.
Шмат цёплых слоў прагучала і ў адрас маці, якая носіць ганаровае званне ”Афіцэрская маці“– Таццяне Хоміч, сын якой сцеражэ сон усіх дзяцей і матуль роднай Беларусі.
Здараецца так, што лёс раскідвае дзяцей па свету, а маці і сэрцам, і думкамі заўсёды імкнецца быць побач. Наталля Кандрацьева ў гэтым годзе двойчы наведвалася да дачушкі Лізы, якая жыве і працуе ў Германіі. Ёй было прысуджана званне ”Маці-падарожніца“.
Званне ”Мая другая мама“ было прысуджана тром бабулям-працаўніцам нашай сістэмы. Раіса Гракава, Людміла Казіцкая і Марыя Сушко прынялі ўдзел у літаратурным конкурсе ”Пазнай казку па першаму сказу“ і паказалі неблагі вынік.
Сям’я – гэта цёплая ўсмешка матулі, добрыя рукі бацькі і вясёлы смех дзяцей. Гэта тое месца, дзе нас заўсёды чакаюць і любяць.
Кульмінацыйным момантам мерапрыемства стала ўшанаванне шматдзетнай маці Валянціны Абрамавай і сям’і Лены Мядзелец, якая разам з мужам Пятром узялі пад апеку чужых дзяцей і выхоўваюць як сваіх.
Для ўдзельніц мерапрыемства былі падрыхтаваны яркія музычныя нумары і памятныя сувеніры, а яшчэ можна было далучыцца да ўдзелу ў прафсаюзнай акцыі, прымеркаванай да Тыдня бацькоўскай любові і павіншаваць дарагіх людзей – маці і бацьку, падпісаўшы маляўнічыя паштоўкі.
