Узрост жыццёвай мудрасці
Кожнаму з нас хочацца заўсёды быць маладым, здаровым, прыгожым, але так павялося, што на змену маладосці прыходзіць сталасць, а потым наступае пара мудрасці і жыццёвага вопыту. Пара, калі чалавек ведае цану і духоўным каштоўнасцям, і самаму жыццю.
Жыве ў вёсцы Валожанкі сціплая жанчына з добрым сэрцам – Зінаіда Канстанцінаўна Машнюк, якая справіла 23 ліпеня 75-ы юбілей свайго жыцця.
З.К. Машнюк не адзін дзясятак год прысвяціла служэнню яе вялікасці кнізе, і таму з нагоды такой значнай даты да яе наведаліся старшыня пярвічнай прафсаюзнай арганізацыі ДУК ”Шаркаўшчынская ЦБС“ Вера Мілянцей і прадстаўнік працоўнага калектыву бібліятэкараў Марыя Сушко, якія выказалі словы віншавання і пажадалі моцнага здароўя, доўгіх год жыцця, павагі і любові ад родных і блізкіх.
Падчас сустрэчы Зінаіда Канстанцінаўна цікавілася справамі і планамі на будучыню ЦБС, лёсам калег-ветэранаў, прыгадала памятныя моманты бібліятэчнага жыцця, а таксама распавяла аб жыцці на заслужаным адпачынку, з вялікай любоўю і цеплынёй жанчына расказвала аб дзецях і ўнуках.
На развітанне Зінаіда Канстанцінаўна пажадала ўсяму калектыву ЦБС плёну ў працы, творчых планаў і задумак, невычэрпнага патоку новых кніжак і ўдзячных чытачоў.
