Творчасць суровая радасная трывожная
30 студзеня 2026 года споўнілася 105 год з дня нараджэння народнага пісьменніка Беларусі Івана Шамякіна, які пакінуў багатую літаратурную спадчыну для многіх пакаленняў беларусаў. Сваёй творчасцю, літаратурным талентам, актыўнай грамадзянскай дзейнасцю і асабістым прыкладам паказаў, як трэба любіць Беларусь і аддана служыць яе народу. Да гэтай знамянальнай падзеі ў бібліятэках сістэмы прайшлі мерапрыемствы.
У Васюкоўскай сельскай бібліятэцы-філіяле аформлена кніжная выстава ”Праведнік чалавечнасці“. На выставе прадстаўлены асобныя творы аўтара: ”Злая зорка”; ”Сатанінскі тур“,”Палеская мадонна“, ”Вазьму твой боль“, ”Сэрца на далоні“, ”Зеніт“, ”Атланты і карыятыды“, а таксама кніга ”Іван Шамякін“ з серыі ”Жыццё знакамітых людзей Беларусі“. Кніга з’яўляецца літаратурнай мазаікай, складзенай з фрагментаў успамінаў самога Івана Шамякіна, яго родных, сяброў, паплечнікаў, з дакументаў, артыкулаў і са шматлікіх фотаздымкаў, якія дазваляюць у храналагічным парадку, год за годам, ствараць адмысловы жыццяпіс пісьменніка і спрыяюць больш глыбокаму разуменню яго асобы.
У Каўшэлеўскай сельскай бібліятэцы-філіяле для чытачоў сярэдняга школьнага ўзросту адбылося літаратурнае падарожжа ”Тварэц праўдзівага жыцця“. Падчас мерапрыемства ўдзельнікі пазнаёміліся з жыццёвым і творчым шляхам пісьменніка і найбольш вядомымі яго творамі. Напрыканцы была праведзена віктарына ”Жыццё і творчасць Івана Шамякіна“.
У Буеўшчынскай сельскай бібліятэцы-клубе-філіяле з нагоды юбілею пісьменніка адбыўся літаратурны вечар ”Творчасць суровая радасная трывожная“.
Першапачаткова бібліятэкар пазнаёміла ўдзельнікаў з жыццёвым шляхам творцы і яго літаратурнай спадчынай, а далей спынілася на агульнавядомых творах, такіх, як раманы ”Сэрца на далоні“, ”Трывожнае шчасце“, ”Злая зорка“ і расказала аб тэмах, сюжэтах творчасці пісьменніка, а таксама аб некаторых героях раманаў. Напрыканцы агляду бібліятэкар параіла ўдзельнікам кнігі для прачытання і ўпэўніла прысутных, што творчасць Івана Шамякіна не страціла сваёй актуальнасці і ў цяперашні час.
