ТАЯМНІЦЫ РОДНЫХ СЛОЎ
Кажуць, мова мая аджывае
Век свой ціхі: ёй знікнуць пара.
Для мяне яна вечна жывая,
Як раса, як сляза, як зара.
П. Панчанка.
21 лютага ва ўсім свеце адзначаецца Міжнародны дзень роднай мовы. У фармаце свята раённая бібліятэка правяла гадзіну адкрыццяў ”Таямніцы родных слоў“. Удзельнікамі мерапрыемства сталі вучні 10 класа сярэдняй школы № 2 г. п. Шаркаўшчына імя Героя Савецкага Саюза Рамана Сцяпанавіча Кудрына (класны кіраўнік Аксана Паўлаўна Пачопка). Удзельнікі азнаёміліся з відэафільмам ”Смак мовы“, прэзентацыяй беларускіх слоў пад песню Вікторыі Дайнэка ”Родная мова“, паслухалі верш ”Калі ласка“ ў выкананні Эвеліны Дунчанка і пазнаёміліся з такімі беларускімі словамі як — імбрык, жырандоля, дыяруш і інш.
Каб замацаваць веды, была прапанавана гульня ”Родныя словы“, у якой свой адказ вучні павінны былі скласці з літар на беларускай мове. Напрыканцы мерапрыемсва прагучалі словы Змітрака Бядулі: ”Не саромся, беларус, гаманіць па-свойму — на роднай мове бацькоў і дзядоў сваіх. Шануй сваю мову, шануй свае песні, свае казкі, свае звычаі і ўсё роднае. Гэта спадчына і вялікі нацыянальны скарб“.
