Сустрэча з нагоды юбілею
8 сакавіка адзначыла 85-гадовы юбілей Аліна Баляславаўна Ракоца, якая большую частку свайго жыцця прысвяціла развіццю бібліятэчнай справы Шаркаўшчынскага раёна.
Павіншаваць юбілярку прыехалі намеснік старшыні Шаркаўшчынскага райвыканкама Ю.А.Васілеўскі, які ўручыў Падзяку ад старшыні Шаркаўшчынскага райвыканкама С.Г.Кашміла, сакратар раённага Савета ветэранаў Маргарыта Багавіч і прадстаўнік прафсаюзнай і ветэранскай арганізацый ДУК ”Шаркаўшчынская ЦБС“ Марыя Сушко.
Падчас сустрэчы Аліна Баляславаўна прызналася, што яна кранута ўвагай з боку мясцовай улады, ёй вельмі прыемна, што пра яе памятаюць і віншуюць з юбілеем. Затым прыгадала той час, калі яна ўзначальвала дзіцячую бібліятэку-філіял. Самыя буйныя і цікавыя мерапрыемствы ў бібліятэцы праходзілі падчас Тыдня дзіцячай і юнацкай кнігі. Штогод урачыстае адкрыццё Тыдня праходзіла на сцэне раённага Дома культуры, у якое абавязкова былі ўключаны элементы тэатралізацыі.
Для самых маленькіх чытачоў у бібліятэцы працаваў клуб па інтарэсах ”Казка“, у якім юныя чытачы не толькі чыталі па ролях любімыя казкі, але і спрабавалі свае сілы ў ролі артыстаў. Удзельнікі клуба развучвалі любімыя казкі па ролях, а затым выступалі перад сваімі сябрамі.
Пацікавілася юбілярка і тым, што новага адбываецца ў бібліятэках і раёне, наогул.
Развітваючыся, госці пажадалі А.Б.Ракоца заставацца і надалей бадзёрай і жыццярадаснай, крэпкага здароўя і толькі радасных імгненняў.
