Семінар бібліятэчных работнікаў
Год гістарычнай памяці, які аб’яўлены сёлета ў нашай краіне, праходзіць пад знакам зберажэння гістарычнай памяці і праўды аб усіх перыядах жыцця беларускага народа. Святы абавязак кожнага – зберагчы і перадаць падрастаючаму пакаленню гістарычную праўду аб Вялікай Айчыннай вайне.
З гэтай нагоды ў нашай сістэме адбыўся семінар ”Роля кнігі і чытання ў патрыятычным выхаванні дзяцей і моладзі“. На пачатку семінара прагучалі метадычныя рэкамендацыі па папулярызацыі літаратуры ваенна-гістарычнай тэматыкі. Увазе бібліятэчных работнікаў быў прарэкламаваны літаратурны зборнік ”Памяць сэрца“, у які ўвайшлі вершы, апавяданні, нарысы, эсэ, прадстаўленыя да ўдзелу ў раённым конкурсе ”Маёй Радзіме прысвячаецца…“
Затым бібліятэчныя работнікі наведалі брацкую магілу савецкіх воінаў і ахвяр фашызму ў вёсцы Шыці. Падчас гадзіны памяці, якую правяла загадчыца Буеўшчынскай бібліятэкі-клуба Н.В. Кандрацьева, бібліятэкары даведаліся аб жудасных падзеях восені 1942 года. У той час на захадзе Шаркаўшчынскага раёна ў Казянскіх лясах дзейнічалі партызанскія атрады. Партызан падтрымлівалі жыхары навакольных вёсак. У лістападзе 1942 года падчас аперацыі пад кодавай назвай ”Нюрнберг“ карнікі расстралялі і зажыва спалілі жыхароў вёсак Кушталі, Свілы, Трабаўшчына, Строна, Журавоўшчына, Куялеўшчына, Бялкова, Сялібка, Ігнацева, Падрэзаўшчына, Станіславова. Спалены былі і самі вёскі. Наталля Віктараўна зачытала ўспаміны жыхара вёскі Трабаўшчына Мяфодзія Уладзіміравіча Вайцяховіча.
Бібліятэкар расказала ўдзельнікам, што ў гонар ушанавання памяці 248 мірных жыхароў гэтых спаленых вёсак, а таксама 15 воінаў, што загінулі ў Вялікай Айчыннай вайне, у 1976 годзе пастаўлены помнік – скульптура воіна ў жалобе і 3 стэлы.
Бібліятэчныя работнікі ўшанавалі памяць загінуўшых хвілінай маўчання і ўсклалі кветкі да помніка.
Наведаўшы Буеўшчынскую бібліятэку-клуб, бібліятэкары прынялі ўдзел у круглым стале ”Беларусь – краіна адзінства і згоды“. Асаблівая ўвага падчас мерапрыемства была нададзена новаму дзяржаўнаму святу – Дню народнага адзінства. Удзельнікі мерапрыемства сышліся ў меркаванні, што абраная для яго дата, 17 верасня, калі ў 1939 годзе адбылося ўз’яднанне заходніх і ўсходніх зямель Беларусі, адлюстроўвае факт гістарычнай справядлівасці.
Другая частка семінара была прысвечана Дню бібліятэк. Бібліятэкары паспаборнічалі між сабой і вызначылі самых вясёлых і знаходлівых, з задавальненнем сустрэліся з Галінай Парфір’еўнай Яблонскай, якая больш 40 гадоў прысвяціла служэнню кнізе і людзям, працуючы ў Іёдскай бібліятэцы.
