ПРЫЕМНЫЯ ЎСПАМІНЫ
У вёсцы Сасноўцы пражывае ветэран бібліятэчнай справы – Валянціна Андрэеўна Буйка, якая 10 чэрвеня адзначыла 70-гадовы юбілей. У гэты дзень да яе завіталі былыя калегі – супрацоўнікі цэнтральнай раённай бібліятэкі. Старшыня пярвічнай прафсаюзнай арганізацыі ДУК ”Шаркаўшчынская ЦБС“ Вера Мілянцей павіншавала юбілярку з адметнай датай у жыцці. Уручыла ёй памятны падарунак, кветкі і выказала шмат цёплых слоў і пажаданняў моцнага здароўя і доўгіх год жыцця.
Мінула больш за 10 год з тае пары, як Валянціна Андрэеўна пайшла на заслужаны адпачынак, але гледзячы на гэту абаяльную жанчыну, ні за што не скажаш, што яна перамінула 70-гадовую мяжу.
Падчас сустрэчы Валянціна Андрэеўна адмеціла, што служэнню яе вялікасці Кнізе яна прысвяціла 38 год. Спачатку загадвала Астраўлянскай бібліятэкай–клубам і два разы на тыдзень наведвалася ў пункт выдачы ў вёсцы Глісцёнкі. Калі цэнтр калгаса імя Леніна перамясціўся ў вёску Сасноўцы, то і бібліятэку перавялі ў Сасноўскі сельскі клуб, у якім для бібліятэкі выдзелілі невялікі пакой. У 1981 годзе праўленне калгаса імя Леніна выдзелілі для бібліятэкі трохпакаёвую кватэру ў двухпавярховым катэджы. Валянціна Андрэеўна арганізавала клуб па інтарэсах ”Праменьчык“, на пасяджэннях якога шмат увагі звяртала на папулярызацыю кнігі і чытання сярод дзяцей. Члены клуба цікавіліся таксама мінулым сваёй мясцовасці. Юныя чытачы разам з бібліятэкарам займаліся зборам старажытных прылад працы і побыту продкаў, якія сталі галоўнымі экспанатамі этнаграфічнага пакою ”Нам засталася спадчына“.
Падчас сустрэчы мы з цікавасцю перагарнулі старонкі сямейнага альбома, у якім шмат фотаздымкаў, дзе Валянціна Андрэеўна з былымі калегамі. Трэба было чуць, з якой цеплынёй яна адзывалася аб некаторых з іх!
Валянціна Андрэеўна разам з мужам Гедыёнам Пятровічам выгадавалі сына і дачку, якімі яны ганарацца. Па-свойму радуюць бабулю і дзядулю чацвёра ўнукаў, якія наведваюцца да іх у госці у час канікулаў і святаў.
Сумаваць юбілярцы некалі. Шмат часу яна аддае працы на прысядзібным участку і хатнім клопатам. Аддушынай ад паўсядзённых спраў у Валянціны Андрэеўны – кветкі. У шутку яна сказала, што залаты юбілей яна адзначала ў квецені бэзу, у год 60-годдзя яе радавалі буйным цветам півоніі. Букет з белых пунпонаў бульданэжу (дэкаратыўнай каліны) прыпаднёс 70-гадовы юбілей.
