Прэс-інфарміна “У госці да “Вясёлкі”
Удзельнікі дзіцячага клуба па інтарэсах “Чамучкі” ў чарговы раз сустрэліся ў Лужкаўскай сельскай бібліятэцы на цікавым і пазнавальным мерапрыемстве, прысвечаным гісторыі ўзнікнення дзіцячага часопіса “Вясёлка”, знаёмства з яго пачынальнікамі і творчымі людзьмі, якія працавалі і працуюць над яго выданнем, выхоўваюць любоў і павагу да беларускага слова, гісторыі і культуры Беларусі праз творы – вершы, казкі, апавяданні, творчыя заданні, змешчаныя на старонках часопіса.
Прэс-інфарміна “У госці да “Вясёлкі” пазнаёміла дзяцей з майстрамі беларускага слова, якія “нарадзілі” часопіс для дашкольнікаў і малодшых школьнікаў – Васіль Вітка, Эдзі Агняцвет, Станіслаў Шушкевіч і інш. і з тымі, хто шчыруе ў “Вясёлцы” сёння – Уладзімір Ліпскі, Алесь Бадак, Алена Масла, Раіса Баравікова, Анатоль Зэкаў і многімі іншымі таленавітымі беларускімі творцамі. Бібліятэкары запрасілі ўдзельнікаў прэс-інфарміны павандраваць па старонках часопіса, на свой густ выбраць заданне з рубрыкі “Хвілінкі-весялінкі” і пагуляць ў цікавыя інтэлектуальныя гульні – фотакрыжаванкі “Што паспела ў садзе”, “Пералётныя птушкі”, “Восеньскае слова”, адгадаць загадкі “Поры года”, разгадаць сканворды і рэбусы “Міфалагічны” і “Школьнае жыццё”. Творчыя заданні “Размалюй” і “Вясёлкавыя ўрокі роднай мовы” былі адным з самых цікавых і жаданных момантаў сустрэчы, дзе дзеці з дапамогай рознакаляровых фарбаў ажыўлялі карцінкі з чорна-белымі букетамі вясновых кветак і крыламі матылькоў, дэкламавалі свае любімыя вершы пра Беларусь, маці, школу і поры года.
Дзеці з цікавасцю павандравалі па старонках часопіса “Вясёлка” і даведаліся шмат новага і карыснага. Галоўнае, што ўсе ў гэты час дружна ўключыліся ў творчасць і гульню, разам думалі над адказамі, спрачаліся і вынаходзілі правільныя рашэнні. Быць цікаўнымі, дапамагаць адзін аднаму і не баяцца памылак – гэтаму вучыць дзяцей іх надзейны сябар – часопіс “Вясёлка”. З ім ніколі не будзе сумна!
