Прэс-фуршэт “Што прынёс нам паштальён?”
Загадчыца Лужкаўскай бібліятэкі-філіяла № 29 Ірына Машара наведалася ў дзіцячы садок, каб бліжэй пазнаёміць дашкольнікаў з дзіцячай перыёдыкай, якую атрымлівае бібліятэка па падпісцы.
Знаёмства прайшло ў форме прэс-фуршэта “Што прынёс нам паштальён?”. Кожны часопіс змог прапанаваць маленькім гледачам шмат цікавых і займальных матэрыялаў. Напрыклад, “Вясёлка” прапанавала беларускія загадкі з градкі і маляванкі з раздзела “Чытанка-маляванка для дашкольнікаў”. Часопіс “Рюкзачишка” прачытаў вершаваную казку пра Цімку і Кузьку з рубрыкі “Мама, пачытай!”, а таксама пажадаў, каб дзеці паспыталі свае сілы ў вырабе арыгамі. З дапамогай дарослых атрымалася зрабіць папяровы караблік, які кожны потым панёс дадому, як напамін аб цікавай сустрэчы. А “Весёлый зоопарк” запрасіў наведаць раздзел “Хатнія жывёлы” і праверыць эрудыцыю малечы: неабходна было адпаведна наклеіць каляровыя выявы жывёл і птушак на прапанаваныя чорна-белыя малюнкі.
Час праляцеў непрыкметна. Нават бацькам прыйшлося чакаць сваіх дзяцей, каб пайсці дадому, бо ўсе былі захоплены маляўнічымі і пазнавальнымі часопісамі. Спадзяёмся, што першая сустрэча маленькіх з дзіцячымі часопісамі паспрыяе ў будучым далучэнню іх да кнігі і чытання, а значыць, папаўненню радоў чытачоў Лужкаўскай бібліятэкі!
