Літаратурныя акорды ў гонар пісьменніка
Юбілей – гэта заўсёды нагода падсумаваць вынікі пражытага за пэўны адрэзак часу, сабрацца разам з сябрамі і аднадумцамі. Так сталася і падчас святкавання 70-гадовага юбілею ў цэнтральнай раённай бібліятэцы беларускага пісьменніка Віктара Праўдзіна.
У пачатку літаратурнага вечара-сустрэчы ”Жывеш толькі раз“ бібліятэкар Іна Суднік адзначыла, што сваё сямідзесяцігоддзе Віктар Аляксандравіч сустракае з важкімі здабыткамі і перамогамі. У літаратурным багажы В.А. Праўдзіна 13 кніг, ён узнагароджаны нагрудным знакам ”Выдатнік друку Беларусі“, медалём Францыска Скарыны. Пісьменнік з’яўляецца лаўрэатам прэміі ”Золотой Купидон“ у намінацыі ”Проза“. У 2021 годзе за раман з прываблівай назвай ”Парыж, Эйфелева вежа і …“ Віктар Аляксандравіч атрымаў Нацыянальную прэмію ў намінацыі ”Лепшы твор прозы“.
Словы шчырай ўдзячнасці і захаплення мастацкім талентам В. Праўдзіна, які дае магчымасць глыбей пазнаць беларускую мову, нацыянальную культуру і гістарычную спадчыну нашага краю, выказалі загадчык сектара культуры Іна Мар’янаўна Шынкевіч і начальнік аддзела ідэалагічнай работы і па справах моладзі Людміла Уладзіміраўна Стома.
Цёплыя словы віншавання выказалі сябры па пяру, удзельнікі народнага калектыву літаратурнай творчасці ”Світанак“. А паэт-зямляк Міледзій Мікалаевіч Кукуць, нават, прысвяціў верш-віншаванне юбіляру.
Аб тым, што значныя творы пісьменніка выклікаюць цікавасць сярод чытачоў, пацвердзілі бібліятэчныя работнікі Васюкоўскай (А.У.Пагарэлава), Германавіцкай (Т.Г. Хоміч) сельскіх бібліятэк і Буеўшчынскай сельскай бібліятэкі-клуба (Н.В. Кандрацьева).
Прыемным сюрпрызам для юбіляра стаў музычны нумар у выкананні Валянціны Абрамавай, бібліятэкара Радзюкоўскай сельскай бібліятэкі. Нечаканасцю для пісьменніка стаў і той факт, што бібліятэкар Лужкаўскай сельскай бібліятэкі-філіяла Лена Гугалінская запрасіла Віктара Аляксандравіча да ўдзелу ў мерапрыемстве пад назвай ”Знаёмы аўтар новых твораў“, якое прысвечана творчасці пісьменніка і адбудзецца ў чэрвені.
На працягу мерапрыемства ўдзельнікі задавалі пытанні аўтару, выказвалі сваё гледжанне на яго творы.
Напрыканцы мерапрыемства В.А. Праўдзін падарыў чытачам кнігу ”Іду насустрач“, што выклікала сапраўдную радасць у аўдыторыі. Удзельнікі мерапрыемства падыходзілі да пісьменніка, каб атрымаць не толькі кнігу, але і аўтограф, які ён пакідаў з цеплынёй і добрымі пажаданнямі.
