НОВЫ ЛІТАРАТУРНЫ ЗБОРНІК ЛЮДМІЛЫ АРДЫНСКАЙ
Прыхільнікам творчасці народнага літаратурна-музычнага аб’яднання “Світанак” добра вядома імя паэткі Людмілы Ардынскай, якая выдала ўжо каля дзясятка кніг паэзіі, была суаўтарам некалькіх паэтычных зборнікаў.
“Як зацвітаюць верасы” – так назвала Людміла Іосіфаўна новую кнігу. У літаратурны зборнік яна ўключыла шмат вершаў, у якіх апявяе родную прыроду, дарагія сэрцу куточкі вялікай радзімы. Вершаваныя радкі паэткі лёгка кладуюцца на музыку і таму у новым зборніку шмат песень, музыку да якіх напісалі Ганна Шакола, Ірына Буднік, Галіна Сафончык.
Значную частку зборніка займаюць празаічныя творы. Эсэ “Мая Бацькаўшчына” – сціплая даніна памяці ўсім загінуўшым на полі боя ў гады Вялікай Айчыннай вайны, закатаваным і спаленым фашыстам.
Апавяданне “Падарожжа ў Каралевец” змяшчае эпізоды з жыцця жыхаркі аграгарадка Радзюкі Ларысы Іванаўны Шпак.
Мяркуем, што да спадобы прыйдзецца чытачам і п’еса “Ганіны клопаты” і апавяданне “Зорка кахання”.
Напрыканцы нагадаем, што зборнік “Як зацвітаюць верасы” выдадзены ў Пастаўскай тыпаграфіі невялікай колькасцю, аднак Людміла Іосіфаўна Ардынская для чытачоў нашай ЦБС падарыла пяць экземляраў кнігі. Вялікі дзякуй Вам за гэта, паважаная Людміла Іосіфаўна!
