НАШ АГУЛЬНЫ ДОМ — ПРЫРОДА
Штогод, 1 красавіка планета адзначае Міжнародны дзень птушак (International Bird Day) – інтэрнацыянальнае экалагічнае свята. Ён узнік у ЗША ў 1894 годзе. Неўзабаве свята, якое атрымала папулярнасць дзякуючы СМІ, пачало масава праводзіцца ва ўсіх штатах, а затым прыйшло ў Еўропу. У 1902 годзе ў Парыжы была падпісана ”Сусветная Канвенцыя аб ахове птушак, карысных у сельскай гаспадарцы“, якую падпісалі больш за дзесятак дзяржаў. Яна ўступіла ў сілу 12 снежня 1905 г. У 1950 годзе яе змяніла Міжнародная канвенцыя аб ахове птушак. З 1906 года ў свеце пачалі адзначаць Дзень птушак. Гэта самае старое экалагічнае свята.
Экалагічная гадзіна ”Наш агульны дом — прырода“ прайшла у Германавіцкай бібліятэцы сумесна з Германавіцкім цэнтрам культуры і народнай творчасці. На мерапрыемства былі запрошаны вучні 5, 6 класаў. У пачатку мерапрыемства бібліятэкар пазнаёміла ўдзельнікаў з гісторыяй гэтага свята. Майстар – клас па вырабу птушак з паперы правяла культарганізатар Наталля Уладзіміраўна Сямчонак. Затым удзельнікі мерапрыемства наведалі парк у аграгарадку Германавічы, дзе назіралі за птушкамі, якія ўжо прыляцелі з выраю, а вырабленых птушак з паперы прымацавалі да галінак дрэў.
Юныя чытачы Дворнаўскай бiблiятэкі з задавальннем прынялі ўдзел у лiтаратурна-гульнёвай вiктарыне ”Вяртайцеся хутчэй“, дзякуючы якой яны даведаліся, што самая прыгожая птушка ў свеце – гэта райская танагра, самая страшэнная – грыфавая цасарка, самая атрутная – пітоху двухкаляровы, а самая разумная птушка ў свеце – гэта крумкач. У канцы мерапрыемства дзеці атрымалі некалькі добрых саветаў, як ахоўваць і берагчы птушак.
