НА САРАКІ ПАЙШОЎ СНЕГ ДА РАКІ
Благаславі, маці,
Вясну заклікаці,
Вясну заклікаці.
Зіму праважаці…
З мэтай прывіцця цікавасці да народных традыцый, развіцця этнаграфічнай культуры ў раённай бібліятэцы было праведзена свята ”На Саракі пайшоў снег да ракі“ разам з вучнямі 10 класа УА”Сярэдняй школы №2 г. п. Шаркаўшчына імя Героя Савецкага Саюза Рамана Сцяпанавіча Кудрына“.
22 сакавіка – дзень вясенняга раўнадзенства. У гэты дзень святкавалі беларускае народнае свята Саракі. У народзе казалі, нібы на Саракі прылятае 40 выраяў і 40 жаваранкаў і ўжо канчаткова прыходзіць вясна. Лічыцца, што менавіта з гэтага дня і пачынаецца сапраўдная вясна. Абуджаецца прырода. Усё навокал напаўняецца прыемнымі пахамі раслін, чароўнымі гукамі, птушыным шчэбетам.
А як жа сустракалі вясну нашы продкі? Якія звычаі і абрады існавалі на Беларусі ў час вясны? На гэтыя і іншыя пытанні ўдзельнікі атрымалі адказы падчас мерапрыемства, а таксама яны паўдзельнічалі ў разнастайных конкурсах і народных забавах, праспявалі прыпеўкі, паласаваліся печывам у выглядзе жаўрукоў.
Майстр народнай творчасці Святлана Заіка правяла майстар-клас па вырабу птушкі ў традыцыйнай народнай тэхніцы ”выцінанка“.
Усім было цікава, весела і запамінальна. Прыемна адчуваць, што і сёння старадаўнія народныя звычаі цікавы для будучага пакалення.
