Міжнародны дзень энергазберажэння
У рамках Міжнароднага дня энергазберажэння з мэтай фарміравання ў чытачоў энергазберагальнай і экалагічнай культуры бібліятэкі ДУК “Шаркаўшчынская ЦБС” правялі шэраг мерапрыемстваў.
Бібліятэкары Лужкаўскай сельскай бібліятэкі-філіяла запрасілі вучняў малодшага школьнага ўзросту ДУА “Лужкаўская сярэдняя школа Шаркаўшчынскага раёна імя воіна-інтэрнацыяналіста М.І. Андзілеўка” на інтэлектуальную гульню “С уважением к энергосбережению”.
Актывізаваць веды і разуменне школьнікаў аб важнасці энергазберажэння, развіваць цікавасць у вывучэнні пытанняў эфектыўнага, бяспечнага выкарыстання і захавання энергіі, якая знаходзіцца ў распараджэнні чалавека, дапамаглі пазнавальныя конкурсы, вясёлыя гульні, віктарыны, загадкі, а таксама практычныя заданні па жыццёвых сітуацыях “Так павінна быць ці не?”, “Электрычны ток у вашым доме”. Дзеці яшчэ раз успомнілі аб тым, што галоўнай крыніцай энергіі на зямлі з’яўляецца Сонца, даведаліся аб тым, якія прыродныя рэсурсы даюць нам энергію і як яна выкарыстоўваецца ў жыцці чалавека.
Цікавым момантам інтэлектуальнай гульні быў аповед-ілюстрацыя “Незвычайная гісторыя звычайнай лямпачкі” пра тое, як чалавек у старажытнасці пасябраваў з агнём, вынайшаў самыя простыя і зручныя крыніцы святлу (свечку з пчалінага воску, керасінавую лямпу, электралямпачку), навучыўся выкарыстоўваць светавую і цеплавую энергію ва ўсіх сферах жыцця. Дзеці дзяліліся ведамі і назіраннямі аб карысці электрычнага тока, газа, вады і цеплаабагрэва ў жыллі чалавека, выказваючы думкі, прыйшлі да высновы: простыя, разумныя правілы энергазберажэння – гэта не толькі эканомія сямейнага бюджэта, але і клопат аб прыродзе і захаванні энергетычных рэсурсаў для будучых пакаленняў.
У Велікасельскай сельскай бібліятэцы-філіяле прайшоў конкурс малюнкаў “Энергазберажэнне вачыма дзяцей”. У ходзе мерапрыемства ў даходлівай форме дзеці ўзнавілі веды па асновах энергазберажэння. Яны адказвалі на пытанні, адгадвалі загадкі, вырашалі практычныя задачы. На пытанне “Што я магу зрабіць для эканоміі энергіі ў сябе дома?” былі атрыманы наступныя адказы: выключаць святло, выходзячы з пакоя; замяніць усе лямпы на энергазберагальныя; не ўключаць без патрэбы электрапрыборы; як мага часцей выкарыстоўваць натуральнае асвятленне.
Для сябе ўдзельнікі зрабілі вывад аб тым, што энергазберажэнне гэта не толькі сэканомлены сямейны бюджэт, але і клопат пра тых, хто будзе жыць далей на нашай планеце Зямля. Самыя простыя спосабы энергазберажэння даступныя любому і могуць прымяняцца ў побыце паўсюдна.
Ніхто не будзе спрачацца, што электрычнасць адыгрывае ў нашым жыцці вельмі важную ролю. Без яе сёння проста немагчыма абысціся. І чым больш мы спажываем электраэнергіі, тым больш актуальнай становіцца праблема ашчаднага яе расходвання. Таму ў Германавіцкай сельскай бібліятэцы-філіяле да Сусветнага дня энергазберажэння для дзяцей малодшага школьнага ўзросту прайшла гадзіна беражлівасці “Энергазберажэнне ў нашым жыцці”.
Падчас правядзення мерапрыемства бібліятэкар імкнулася даць навучэнцам уяўленне аб ролі электрычнасці ў нашым жыцці, падвесці да думкі аб неабходнасці эканомнага і беражлівага яе выкарыстання. Бібліятэкар разам з вучнямі разглядала магчымыя варыянты энергазберажэння ў школе і дома, разважалі над тым , як можна больш ашчадна скарыстоўваць электрычную энергію, але каб не нашкодзіць здароўю.
Дзень энергазберажэння – гэта выдатная нагода яшчэ раз пагаварыць аб энергаэфектыўных тэхналогіях, аб спосабах энергазберажэння дома і ў школе. Эканоміць энерагарэсурсы – значыць быць сучасным, адукаваным грамадзянінам, думаць пра росквіт сваёй краіны, пра дабрабыт і здароўе сваёй сям’і.
