МАРШРУТ АДЗІНСТВА
Бібліятэкар Германавіцскай бібліятэкі прыняла ўдзел у велапрабегу ”Маршрут адзінства“, ініцыятарам якога выступіла ўстанова культуры ”Мастацка-этнаграфічны музей імя Я.Н. Драздовіча“. Удзельнікі велапрабегу прысвяцілі яго новаму святу – Дню народнага адзінства, якое адзначаецца 17 верасня. Напачатку мерапрыемства ім была прадстаўлена карціна віцебскага мастака Леаніда Шчамялёва ”17 верасня “, якая захоўваецца ў фондзе музея і прысвечана ўз’яднанню Заходняй і Усходняй Беларусі ў 1939 годзе.
Удзельнікі велапрабегу пазнаёміліся з матэрыяламі музея, якія звязаны з гэтай падзеяй і накіраваліся ў аграгарадок Лужкі. Метавіта тут Язэп Драздовіч у гэты перыяд працаваў настаўнікам малявання, батанікі і астраноміі ў Лужкаўскай школе.
У аграгарадку Лужкі да падарожнікаў далучылася бібліятэкар Верацееўскай бібліятэкі, якая расказала аб гістарычных і памятных мясцінах Лужкаўскай зямлі: брацкай магіле воінаў Чырвонай Арміі і партызан, магіле партызанкі Анастасіі Бельскай, унікальным артэфакце, адзіным ў Рэспубліцы Беларусь – 107-мм гармаце ўзору 1910/30 гадоў, былым маёнтку Гарадзец.
Наведаўшы гістарычныя мясціны, удзельнікі велапрабегу вярнуліся ў Германавічы.
