Маёй душы прытулак ад калыскі
У мастацка-этнаграфічным музеі імя Я. Драздовіча прайшла сустрэча-ўспамін ”Маёй душы прытулак ад калыскі“, на якой адбылася прэзентацыя зборніка паэзіі Таццяны Еўдаковай ”Озарение“.
Мерапрыемства падрыхтавалі і правялі супрацоўнікі музея, бібліятэкар Германавіцкай сельскай бібліятэкі, удзельнікі народнага калектыва літаратурнай творчасці ”Світанак“.
На сустрэчы было шматлюдна: прыйшлі родныя і блізкія людзі, сябры, знаёмыя, аднавяскоўцы.
Віктар Лагун пазнаёміў прысутных са зборнікам паэзіі ”Озарение“, у які ўвайшлі практычна ўсе творы паэтэсы. Дзякуючы Віктару Лагуну, кніга пабачыла свет.
Сваімі ўспамінамі падзяліліся ўдзельнікі народнага калектыва літаратурнай творчасці”Світанак“. Зачытвалі ўрыўкі з вершаў паэтэсы, акцэнтуючы ўвагу на тое, што вершы неразгадана глыбокія, жаноцкія. У іх цесна пераплятаюцца філасофскія, хрысціянскія, жыццёвыя матывы. У вершах Таццяны Еўдаковай няшмат радаснага, але ў аснове сваёй яны чыстыя, празрыстыя, далікатныя, быццам бы з крышталя. Да іх, калі і дакранацца, то вельмі асцярожна, хіба што душой.
Кожны з прысутных меў магчымасць падзяліцца сваімі думкамі наконт творчасці зямлячкі. У памяці сваіх родных, сяброў, землякоў Таццяна Несцераўна застанецца светлым чалавекам з тонкай душой.
