Літаратурны альманах
У дзіцячай бібліятэцы-філіяле да 95-годдзя беларускага пісьменніка Уладзіміра Караткевіча адбыўся літаратурны альманах, да ўдзелу ў якім былі запрошаны навучэнцы 11-х класаў ДУА ”Сярэдняя школа №1 г. п. Шаркаўшчына“ і ДУА ”Сярэдняя школа № 2 г.п. Шаркаўшчына імя Героя Савецкага Саюза Рамана Сцяпанавіча Кудрына“.
Падчас відэапрэзентацыі бібліятэкар Людміла Казіцкая пазнаёміла ўдзельнікаў мерапрыемства з малавядомымі фактамі жыцця пісьменніка і адзначыла, што талент Уладзіміра Караткевіча быў такі ж шматгранны, як і яго веды і асабістыя інтарэсы, але самае галоўнае тое, што ён – заўзяты жыццялюб. Ім адмаўлялася ўсё, што сыходзіла ад змрочнага, пачварнага, нялюдскага, незалежна ад часу, у якім яно праяўлялася. Героі яго твораў блізкія пісьменніку па духу і шырыні натуры.
Асобна бібліятэкар застанавілася на аповесці ”Ладдзя роспачы“, бо твор своеасаблівы і для самога Караткевіча. У ім аўтар ў вобразе галоўнага героя паказаў нацыянальны характар беларуса і распавёў аб супрацьстаянні жыцця і смерці. З цікавасцю ўдзельнікі паглядзелі анімацыйны фільм ”Ладдзя роспачы“, зняты ў 1987 годзе на кінастудыі ”Беларусьфільм“.
Напрыканцы ўсе пагадзіліся з думкаю, што Уладзімір Караткевіч пакінуў нам таленавітую, самабытную мастацкую спадчыну як запавет – цаніць і берагчы жыццё, якое з’яўляецца найвышэйшым цудам.
