Купалле ў бібліятэках
З 6 на 7 ліпеня ў Беларусі адзначаецца адно з самых любімых і вясёлых народных святаў – свята Купалле. Столькі традыцый, абрадаў, паданняў, колькі нясе з сабою Купалле, не сустрэнеш ні ў адным з іншых беларускіх святаў.
У Зоркаўскай сельскай бібліятэцы-клубе вясёлыя сяброўкі Матрона і Ганна зарадзілі добрым настроем удзельнікаў фальклорнага свята ”Купалінка, Купалінка – цёмная ночка“, у праграме якога былі народныя песні і танцы, тэатральныя пастаноўкі, карагоды і купальскае вогнішча.
”Дзе лунаюць таямніцы“ – назва купалаўскіх чытанняў і свята Купалля, якое адбылося ў дзіцячай бібліятэцы.
Першая частка свята была прысвечана песняру беларускай зямлі – Янку Купалу (Івану Дамінікавічу Луцэвічу), які нарадзіўся 7 ліпеня. Бібліятэкар растлумачыла ўдзельнікам, чаму пісьменнік узяў псеўданім Янка Купала. Справа ў тым, шт псеўданім утвораны ад беларускай версіі імя Іван і назвы свята. Падчас мерапрыемства прысутныя гучна дэкламавалі спадабаўшыяся ім вершы класіка беларускай літаратуры.
Затым мерапрыемства плаўна перайшло да святкавання Купалля. Падчас мерапрыемства ўдзельнікі пазнаёміліся з народнымі абрадамі і традыцыямі Купалля і прынялі ўдзел у конкурсе на лепшы купальскі вяночак. Падвёўшы вынікі конкурсу і атрымаўшы ўзнагароды, дружна рушылі на бераг Дзісны, каб загадаўшы жаданне, пусціць свае вяночкі па вадзе.
Па дарозе завіталі да Ката-ахоўніка, які пажадаў усім цікава правесці час і знайсці сваё шчасце, бо Купалле – свята чароўнае, поўнае загадак і таямніц.
