Краязнаўчая гасцёўня
Убачыць і адчуць хараство зямлі можна толькі там, дзе нарадзіўся і вырас, дзе свядома пачаў глядзець на жыццё. Гэта тое хараство, якое чаруе вока, уздымае настрой, дае светлую надзею на будучыню. Яно, у першую чаргу, заключаецца ў самаадданай і стваральнай працы чалавека, улюблённага ў сваю справу, які беспамылкова верыць, што яго справа будзе карыснай і прынясе плён наступным пакаленням.
Такімі словамі пачалася краязнаўчая гасцёўня ”Сікораўскай душы часцінка“ у Лужкаўскай сельскай бібліятэцы, прысвечаная 35-годдзю з часу заснавання Мемарыяльнага музея садавода-селекцыянера І.П.Сікоры ў вёсцы Алашкі. Пад час мерапрыемства прысутных пазнаёмілі з жыццёвым шляхам і працоўнай дзейнасцю Івана Паўлавіча Сікоры, расказалі пра гісторыю арганізацыі музея, пра вядомы гатунак яблыкаў ”Памяць Сікоры“, узгадалі сяброў і аднадумцаў Івана Паўлавіча – пісьменнікаў М.Машару, М.Прышвіна, Л.Талстога, мастака П.Сергіеевіча, а таксама расказалі пра абласное свята ”Яблычны фэст“ ў Алашках, якое стала брэндам Шаркаўшчынскага раёна. Не абышлася наша сустрэча і без міні-прэзентацыі кнігі ”Яблыневы сад“. Напрыканцы ўдзельнікаў чакала ”Яблычная віктарына“, за правільныя адказы ў якой можна было пачаставацца смачнымі яблыкамі і грушамі.
