Храм веры ў сэрцы маім
У Буеўшчынскай сельскай бібліятэцы-клубе-філіяле прайшла гадзіна духоўнасці ”Храм веры ў сэрцы маім“, прымеркаваны да Дня праваслаўнай кнігі.
Падчас мерапрыемства ўдзельнікі абмеркавалі тэму духоўнасці чалавека ў сучасным свеце, як не адчаіцца ў горы, як сярод смутку знаходзіць радасць.
Увазе ўдзельнікаў была прарэкламавана кніга беларускага пісьменніка Віктара Праўдзіна ”Непераможны злом“. Бібліятэкар звярнула ўвагу прысутных на тое, што ў ёй распавядаецца аб апошнім месяцы жыцця айца Канстанціна Жданава, які служыў святаром у шаркаўшчынскай Свята-Успенскай царкве ў самыя складаныя і пераломныя гады ў краіне: Першая сусветная вайна, рэвалюцыя 1917 года, усталяванне Савецкай улады. За веру ў Бога ў 1919 годзе айцец Канстанцін прыняў мучаніцкую смерць. Але і сёння імя Канстанціна Жданава займае асаблівае месца ў гісторыі нашага краю. Жыхары Шаркаўшчыны лічуць яго духоўным заступнікам. Пабудаваная ім царква дасюль дзейнічае, яна ніколі не зачынялася. А Канстанцін Жданаў прылучаны да ліку святых, яго мошчы знаходзяцца ў кафедральным саборы Полацка і невялікая іх частка – у Свята-Успенскім храме Шаркаўшчыны.
