КАЛІ НА ПЛАНЕЦЕ ГАСПАДАРЫ ДЗЕЦІ
Да Дня абароны дзяцей у Лужкаўскай бібліятэцы прайшла гульня-асарці ”Калі на планеце гаспадары дзеці”. Вучні малодшых класаў – дапытлівыя і цікаўныя – завіталі на мерапрыемства літаратурных конкурсаў і віктарын, вясёлых гульняў і пацешак.
Напачатку адбылося невялікае знаёмства з бібліятэкай, у час якога юныя чытачы даведаліся якія кнігі, часопісы і газеты жывуць у бібліятэцы , пазнаёміліся з правіламі карыстання яе паслугамі. Конкурс “Знаўцы казак” распачаў вясёлае, пазнавальнае падарожжа па кніжнаму царству. Дзеці ўспаміналі любімых казачных герояў па апісанню, дапаўнялі вершаваныя радкі пра казкі і адгадвалі сюрпрызы-загадкі пра казачныя рэчы: боты-скараходы, ступу Бабы Ягі, паветраны шарык і іншыя. Гульня “Рознакаляровы серпантын” працягвала падарожжа-вандраванне па кнігах; на гэты раз, прыродазнаўчага характару. У час займальнага конкурса дзеці паспрачаліся ў веданні дзікіх і хатніх жывёл, іх звычак. Цікавае заданне – адгадаць прадмет па яго кароткаму словаапісанню – было не вельмі цяжкім іспытам для ўдзельнікаў, бо яны эрудыраваныя і кемлівыя.
Сярод дзіцячых перыядычных выданняў асаблівую цікавасць выклікалі часопісы “Весёлый зоопарк”, “ Рюкзачишка” і “Вясёлка” , знаёмства з якімі і прадоўжыла займальнае мерапрыемства. Час забаў і гульняў, пазнавальных момантаў праляцеў вельмі хутка, засталіся станоўчыя эмоцыі – бадзёры, радасны настрой, сапраўдная атмасфера сяброўства і дабрыні. А гэта бывае толькі тады, калі “на планеце – шчырыя гаспадары дзеці “.
