Гонарам Лужкаўскай бібліятэкі з’яўляюцца яе чытачы
Гэта людзі самых розных узростаў і прафесій, з асабістымі культурнымі і інфармацыйнымі запытамі, інтарэсамі і захапленнямі. Чытачы нашай бібліятэкі змаглі даказаць, што яны не проста чытачы, а таленавітыя, адданыя друкаванаму слову кнігалюбы, якія не ўяўляюць жыцця без кнігі. Яны – актыўныя і патрабавальныя, сур’ёзныя і ўдумлівыя, дапытлівыя і цікаўныя, заўсёды знаходзяць хвілінку, каб зазірнуць у бібліятэку, палістаць любімыя часопісы і газеты, пазнаёміцца з кніжнымі навінкамі, перачытаць яшчэ раз цікавую кнігу.
Гэтыя людзі чытаюць не толькі для асалоды, але могуць і падзяліцца з іншымі новымі ведамі, абмяняцца меркаваннямі аб прачытаным. Галоўнае, што іх аб’ядноўвае – любоў да кнігі і чытання, адданасць нашай бібліятэцы.
І таму ідэя ўшанавання актыўных чытачоў узнікла не выпадкова.
30 верасня адбылася прэзентацыя фотаальбома ганаровых чытачоў пад назвай “Счастье быть читателем”. Падзея праходзіла ва ўрачыстай, цёплай, сяброўскай абстаноўцы і пакінула шмат прыемных уражанняў. Дзяліліся сваімі чытацкімі захапленнямі, выказвалі пажаданні развіцця і творчасці любімай бібліятэцы, а таксама былі адзначаны асабістымі намінацыямі: Мікалай Мікалаевіч Атрахімовіч – “Актыўны наведвальнік бібліятэкі”, Караліна Мамэртаўна Гугалінская – “Ледзі любоўнага рамана”, Ларыса Рыгораўна Лагун “Знаўца роднага слова”. З гонарам атрымалі намінацыі Кацярына Уладзіміраўна Дарафеева “Самы дапытлівы чытач” і Арсеній Дарафееў – “Перспектыўны чытач”. Свае заслужаныя ўзнагароды атрымалі таксама Вольга Венедзіктаўна Забела – “ Шматгранны чытач”, Ірына Мітрафанаўна Гаўрылавец і Крыўка Алена Васільеўна як “Надзейныя сябры бібліятэкі”, Таццяна Ананьеўна Эйтміновіч атрымала званне “Актыўны карыстальнік камп’ютарнымі паслугамі”, Ірына Мікалаеўна Конан заняла перамогу разам са сваімі дамачадцамі ў намінацыі “Чытаем усёй сям’ёй”. Да ўрачыстай дзеі далучыліся і многія іншыя чытачы Лужкаўскай бібліятэкі.
Напрыканцы сустрэчы за кубачкам гарбаты і смачнымі пірагамі вялася цёплая сяброўская размова пра кнігі і чытанне, надзённыя праблемы і планы аб новай сустрэчы кнігалюбаў.
І тут нельга не пагадзіцца са словамі рускага паэта і пісьменніка Самуіла Маршака: “Литературе также нужны талантливые читатели, как и талантливые писатели. Именно на них, на этих чутких, обладающих творческим воображением читателей и рассчитывает автор, когда напрягает все свои душевные силы в поисках верного слова “.
