Гадзіна смутку ”Чарнобыль: лёсы, падзеі, памяць“
У Германавіцкай сельскай бібліятэцы-філіяле прайшла гадзіна смутку ”Чарнобыль: лёсы, падзеі, памяць“, прымеркаваная да Дня памяці загінуўшых у радыяцыйных аварыях і катастрофах.
На пачатку мерапрыемства бібліятэкар паведаміла прысутным, навучэнцам тэатральнага аддзялення ДУА ”Лужкаўская дзіцячая школа мастацтваў“, аб жудасных падзеях, якія адбыліся 26 красавіка 1986 года на Чарнобыльскай атамнай станцыі.
Пры дапамозе карты Беларусі прысутныя больш наглядна ўявілі ”чорныя плямы“ на карце – Хойнікі, Брагін, Краснаполле, Чачэрск…
Затым увага ўдзельнікаў была скіравана на творчасць беларускіх пісьменнікаў, якія ў сваёй творчасці закранулі тэму атамнай трагедыі: Івана Мележа. Міколы Мятліцкага, Івана Шамякіна. Больш падрабязна спыніліся на аналізе апавядання Івана Пташнікава ”Львы“ і знаёмстве з кнігай ”Прайсці праз зону”. Распавядаючы пра кнігу, бібліятэкар адзначыла, што асаблівай павагі заслугоўваюць палотны мастака Уладзіміра Цітавіча Гардзеенкі, які не адзін месяц правёў на роднай Хойнікшчыне, вандруючы па зоне адчужэння з пэндзлем і фарбамі. Удзельнікі мерапрыемства пазнаёміліся з імі і выказалі свае думкі.
Напрыканцы мерапрыемства прагучалі вершы Анатоля Грачанікава, Міколы Мятліцкага, Сяргея Законнікава.
