ЭТНАГРАФІЧНАЯ ГАДЗІНА “ПОВЯЗЬ ЧАСОЎ – БЕЛАРУСКІ РУЧНІК“.
Беларусы, як не адзін з іншых еўрапейскіх народаў, захавалі ў жывым функцыяніраванні незлічонае багацце фальклору да нашых дзён. Ручнік – найкаштоўнейшы здабытак беларускай культуры і мастацтва. Пра яго можна шмат чаго гаварыць, шмат паказваць прыкладаў народнага мастацтва. Кожная нітачка ручніка мае свой сімвалічны сэнс. Сёння мы павінны памятаць галоўнае – ручнік гэта не толькі наша гісторыя. Гэта повязь часоў мінулых і сучасных. Бо і сёння бачым ручнікі, якія выкарыстоўваюць пры правядзенні шлюбнага абраду, у царкве, калі сустракаюць хлебам-соллю паважаных гасцей. Менавіта з гэтай нагоды 21 ліпеня ў раённай бібліятэцы прайшла этнаграфічная гадзіна “Повязь часоў – беларускі ручнік“.
Мерапрыемства наведалі вучні лагераў першай і другой школ г.п.Шаркаўшчына. Вядучая Іна Суднік сустрэла ўдзельнікаў караваем і прачытала верш ”Беларускі ручнік“ мясцовай паэткі Людмілы Ардынскай. Яны разам з калектывам ”Душэўная ўтульнасць“ пад кіраўніцтвам Сафончык Галіны Пятроўны праспявалі песні. З задавальненнем пазнаёміліся з работамі майстроў нашага раёна Людмілай Ананіч, якая працуе бібліятэкарам у Більдзюгскай сельскай бібліятэцы, Ірынай Грунінай, майстрам-метадыстам раённага Цэнтра рамёстваў. Убачылі ручнікі з фонду Шаркаўшчынскага раённага Цэнтра рамёсел. Для выставы Людміла Ананіч прывезла не толькі ручнікі, якія вышывала сама, але і сямейную рэліквію – вясельны ручнік, якому 100 год.
