Дзень работнікаў культуры
Бібліятэчныя работнікі і ветэраны бібліятэчнай справы прынялі ўдзел у раённых урачыстых мерапрыемствах, прысвечаных Дню работнікаў культуры, падчас якіх адбылося ўшанаванне лепшых прадстаўнікоў сферы культуры, дзякуючы якім развіваецца беларуская культура і расце духоўны дабрабыт грамадства.
Для ветэранаў сферы культуры быў арганізаваны вечар адпачынку, у якім прынялі ўдзел і бібліятэчныя работнікі. На сустрэчу з калегамі прыйшлі Г.П.Яблонская, З.К.Машнюк, Л.К.Мацкевіч, якія ў мінулым умела папулярызавалі кнігу ў Іёдскай, Амбросенскай і Малонкаўскай сельскіх бібліятэках. Разам з Марыяй Людвігаўнай Талапіла і Валянцінай Эдуардаўнай Касевіч, якія не адзін год узначальнавалі ЦБС, былыя бібліятэкары за кубкам духмянага чаю прыгадалі прыемныя моманты сваёй працоўнай дзейнасці, распавялі аб поспехах дзяцей і ўнукаў, падзяліліся сваімі захапленнямі.
Прыемным момантам сустрэчы работнікаў культуры з нагоды прафесійнага свята стала цырымонія іх ўзнагароджання. Ганаровымі граматамі ад упраўлення культуры за шматгадовую добрасумленную працу, асабісты ўклад у развіццё і захаванне нацыянальнай культуры і ў сувязі з прафесійным святам былі ўзнагароджаны загадчыца дзіцячай бібліятэкі Тамара Эдвардаўна Паляк і бібліятэкар Германавіцкай сельскай бібліятэкі Таццяна Генадзьеўна Хоміч.
Цёплыя і сардэчныя віншаванні з прафесійным святам і шчырая падзяка за працу прагучалі ад дырэктара цэнтралізаванай бібліятэчнай сістэмы Т.М. Райчонак і старшыні пярвічнай прафсаюзнай арганізацыі ДУК ”Шаркаўшчынская ЦБС“ В.А.Мілянцей, якія ўручылі таленавітым і ініцыятыўным работнікам ЦБС граматы і кветкі.
У цёплай сяброўскай абстаноўцы работнікі культуры падзяліліся сваімі планамі і здзяйсненнямі.
