Душа за радок зачапілася
У Буеўшчынскай сельскай бібліятэцы-клубе-філіяле адбылася жывая размова ”Душа за радок зачапілася“, якая была прымеркавана да Міжнароднага дня паэзіі. У мерапрыемстве прынялі ўдзел паэты-землякі, члены ГА ”Саюз пісьменнікаў Беларусі“ Віктар Лагун і Міледзій Кукуць.
На пачатку мерапрыемства бібліятэкар Наталля Кандрацьева прыгадала гісторыю ўзнікнення свята і падкрэсліла, што чытачы па-рознаму ставяцца да паэзіі: камусьці падабаюцца вершы пра каханне, а хтосьці не можа і імгнення пражыць без прыроднай лірыкі, вершаў-прызнанняў у любові роднаму краю, матулі і ўслаўленню чалавека працы.
Падчас мерапрыемств, якое доўжылася амаль дзве гадзіны, паэты-землякі чыталі свае вершы, прысвечаныя 80-годдзю Вялікай Перамогі савецкага народа ў гады Вялікай Айчыннай вайны, малой радзіме, роднай вёсцы. Да спадобы ўдзельнікам прыйшліся і гумарыстычныя вершы паэтаў-землякоў.
Напрыканцы сустрэчы актыўная чытачка бібліятэкі Ала Вацлаваўна Салачонак прачытала верш уласнага сачынення, а Віктар Ільіч і Міледзій Мікалаевіч падарылі чытачам бібліятэкі свае кнігі.
