Дарогі, якія мы выбіраем
Выбар прафесіі – адзін з адказных момантаў, які вызначае жыццёвы шлях чалавека. Важным звяном у гэтай дзейнасці выступаюць і бібліятэкі, бо яны валодаюць неабходнай інфармацыяй аб прафесіях, навучальных установах, у якіх можна набыць выбраную спецыяльнасць.
Загадчыца Лужкаўскай сельскай бібліятэкі для старшакласнікаў УА ”Лужкаўская сярэдняя школа Шаркаўшчынскага раёна“ правяла прафарыентацыйную гульню-знаёмства ”Дарогі, якія мы выбіраем“. Падчас мерапрыемства Ірына Машара імкнулася зарыентаваць выпускнікоў у выбары будучай прафесіі.
Пры дапамозе электроннай прэзентацыі бібліятэкар пазнаёміла з прафесіямі, запатрабаванымі ў Рэспубліцы Беларусь. Асаблівая ўвага была накіравана на знаёмства з прафесіяй бібліятэкара новага пакалення, бо сучасны бібліятэкар – гэта і спецыяліст у галіне інфармацыйных тэхналогій. Сёння бібліятэкары працуюць з рознымі інфармацыйнымі носьбітамі, з аўдыё- і відэаматэрыяламі, электроннай поштай, ствараюць базы данных, вядуць сайт бібліятэкі і старонкі ў сацыяльных сетках. Таму Ірына Іосіфаўна выказала думку аб тым, што старшакласнікі не памыляцца, калі зробяць выбар на карысць гэтай прафесіі, бо дзверы Беларускага дзяржаўнага ўніверсітэта культуры і мастацтваў, дзе рыхтуюць спецыялістаў бібліятэчна-інфармацыйнага профілю, заўсёды адчынены для абітурыентаў. І з года ў год попыт на гэтую спецыяльнасць ёсць.
Тэставыя заданні дапамаглі ўдзельнікам мерапрыемства вызначыць тып прафесіі, да якой у кожнага з іх маюцца значныя схільнасці.
Напрыканцы мерапрыемства ўсе з задавальненнем паўдзельнічалі ў гумарыстычнай віктарыне.
