Чарнобыль-трагедыя чалавецтва
26 красавіка 1986 г. адбылася самая страшная тэхнагенная катастрофа ў гісторыі чалавецтва – аварыя на Чарнобыльскай атамнай электрастанцыі. 38 гадоў аддзяляюць нас ад тых трагічных падзей, але беларускі народ памятае падзеі тых жудасных дней, захоўвае памяць аб іх і перадае падрастаючаму пакаленню.
Да гэтай памятнай даты бібліятэкары сістэмы падрыхтавалі і правялі мерапрыемствы.
Для вучняў старэйшых класаў ДУА ”Лужкаўская сярэдняя школа Шаркаўшчынскага раёна“ бібліятэкары Лужкаўскай сельскай бібліятэкі правялі гутарку-прэзентацыю ”Чарнобыль – боль чалавецтва“. Падчас сустрэчы прысутныя пазнаёміліся з інфармацыйным матэрыялам пра пачатак развіцця і асваення чалавекам атамнай энергіі яшчэ ў 1950-х гадах ХХ ст., закранулі тэму сур’ёзнай адказнасці пры яе выкарыстанні і зберажэнні акружаючага асяроддзя ў рашэнні праблем экалогіі і здароўі чалавека, а таксама яшчэ раз успомнілі падзеі тых дзён, калі адбыўся ўзрыў на чацвёртым рэактары станцыі. Цікавы аповед аб наступствах трагедыі для чалавека і ўсёй жывой прыроды, аб першых ліквідатарах катастрофы і іх лёсах, аб перасяленцах з Чарнобыля і Прыпяці і ”городах-призраках“, у якіх спынілася на доўгія гады жыццё, дапоўніўся праглядам прэзентацыі ”Чарнобыль у нашай памяці“ і знаёмствам з дакументальна-мастацкай літаратурай міні-выставы ”Злая зорка“. Напрыканцы мерапрыемства ўдзельнікі выказалі свае думкі і спачуванні пацярпелым чарнобыльскай трагедыі і на рознакаляровых папяровых пялестках кветак напісалі свае пажаданні ў будучыню аб захаванні асцярожнасці ў выкарыстанні атамнай энергіі ў мірных мэтах і адказнасці за жыццё на Зямлі, прымацаваўшы пялесткі-пажаданні да імправізаванага зямнога шара.
У ДУА ”Германавіцкая сярэдняя школа Шаркаўшчынскага раёна“ прайшла гадзіна смутку ”Чарнобыль у памяці і кнігах“, якую падрыхтавалі і правялі бібліятэкар Германавіцкай сельскай бібліятэкі Хоміч Т.Г. і настаўнік біялогіі Фёдарава М.А.
Пры дапамозе карты Беларусі, прысутныя больш наглядна ўявілі ”чорныя плямы“ на карце – Хойнікі, Брагін, Краснаполле, Чачэрск…
Падчас сустрэчы бібліятэкар правяла агляд твораў беларускіх пісьменнікаў, прысвечаных чарнобыльскай трагедыі. Ішла гаворка аб творчасці М. Мятліцкага, С. Законнікава, Б. Сачанкі, І. Шамякіна, І. Пташнікава і інш. У зоне адчужэння і адсялення засталіся родныя вёскі І. Мележа, М. Мятліцкага. Больш падрабязна спынілася на аналізе апавядання І. Пташнікава ”Львы“. Некаторыя ўрыўкі з апавядання былі зачытаны дзецьмі.
Напрыканцы мерапрыемства адбылося знаёмства з кнігамі” Прайсці праз зону“, якая выйшла ў 1996 годзе да дзесяцігоддзя самай трагічнай катастрофы нашага стагоддзя, і кнігай ”Чарнобыльская рана“.
Гадзіна-рэквіем ”Скрозь прызму дзесяцігоддзяў“ прайшла ў аддзяленні рэабілітацыі, абілітацыі інвалідаў ДУ ”Тэрытарыяльны цэнтр сацыяльнага абслугоўвання насельніцтва Шаркаўшчынскага раёна“, які быў падрыхтаваны і праведзены Шаркаўшчынскай цэнтральнай раённай бібліятэкай. Бібліятэкар Р. Гракова распавяла наведвальнікам аддзялення аб тым страшным дні 26 красавіка 1986 года і тых падзеях, якія адбываліся на ЧАЭС, як лівідаткары спрабавалі ліквідаваць тэхнагенную катастрофу. Працаваць у такіх умовах дзеля жыцця і здароўя жыхароў планеты Зямля-сапраўдны подзвіг. Р.Н. Гракова падзялілася ўражаннямі аб паездках па адселеных вёсках. Наведвальнікі выказалі сваё меркаванне, успаміналі сваіх знаёмых, хто прайшоў праз пекла Чарнобыля, а таксама пазнаёміліся з выставай літаратуры па гэтай тэме.
