”Бярозкі“ дзіўнае святло
У дзіцячай бібліятэцы-філіяле прайшоў відэачасопіс ”Бярозкі“ дзіўнае святло”, прымеркаваны да 100-годдзя з дня выхаду беларускамоўнага грамадска-палітычнага і літаратурна-мастацкага часопіса для падлеткаў ”Бярозка“ (1924–2024), які з лістапада 2023 года мае статус інтэлектуальнага часопіса для падлеткаў.
Навучэнцам 9”А“ класа ДУА ”Шаркаўшчынскай СШ №2 імя Героя Савецкага Саюза Рамана Сцяпанавіча Кудрына“ было цікава даведацца пра гісторыю і сучаснасць бытавання часопіса. Бібліятэкар Л.Казіцкая ва ўступным слове адзначыла, што галоўная місія часопіса – выхаванне грамадскай актыўнасці, патрыятызму, творчых здольнасцей маладых чытачоў. Насця Федаровіч, удзельніца літаратурнага клуба ”Жывое слова“, праводзячы анонс новага нумара часопіса, падкрэсліла, што ў кожным нумары друкуюцца літаратурныя, журналісцікія і навуковыя матэрыялы. У выданні разнастайныя рубрыкі, накіраваныя на інтэлектуальнае і псіхалагічнае развіццё падлеткаў, пашырэнне іх культурна-мастацкага кругагляду і творчых уменняў: ”Праектар“, ”АРТ-прастора“, ”Падзеі“, ”PROпрафесію“, ”Міфалогія“ і іншыя.
Удзельнікі мерапрыемства з задавальненнем паслухалі запіс песні 17-гадовага блогера з Мінску Іллі Шынкарэнка, даведалісь як юнак вырашыў размаўляць на роднай мове і таксама пісаць на беларускай мове вершы да сваёй музыкі.
Напрыканцы ўдзельнікі размалявалі і напісалі віншаванні для ”Бярозкі“ на вялікім папяровым сэрцы, якое плануюць даслаць у рэдакцыю часопіса.
