“Буквар. Таямніцы чатырох стагоддзяў”
У снежні мінулага года ў Віцебскай абласной бібліятэцы адбылася прэзентацыя факсімільнага выдання першага беларускага “Буквара”. Пад час мерапрыемства кожная раённая бібліятэка атрымала ў падарунак гэта рарытэтнае выданне.
З гэтай нагоды ў дзіцячай бібліятэцы-філіяле №1 для вучняў 1-4 класаў ДУА “Сярэдняя школа №2 г.п. Шаркаўшчына” адбылася навукова-гульнявая праграма “Буквар. Таямніцы чатырох стагоддзяў”, дзе бібліятэкар пазнаёміла дзяцей з гісторыяй стварэння першага беларускага “Буквара”.
У ходзе мерапрыемства, дзякуючы “карагоду азбукі”, маленькія чытачы пазнаёміліся з першымі літарамі стараславянскага алфавіту. Таксама ўбачылі і патрымалі ў руках факсімільнае выданне першага беларускага “Буквара”. Даведаліся і пра аднаго са стваральнікаў “Буквара” – Сімяона Полацкага, які ў 1679 годзе выдаў ва ўласнай друкарні ў Маскве выданне для дзяцей. Як казаў вялікі настаўнік, вучоны, святар: “Разум во книгах изобретают”.
