Ад іх імёнаў квітнее родная зямля
Работнікі Лужкаўскай сельскай б
ібліятэкі прадаўжваюць ладзіць цыкл сустрэч з цікавымі, таленавітымі людзьмі лужкаўскай зямлі.
У гэты раз адна з такіх сустрэч ”Ад іх імёнаў квітнее родная зямля“, сумесна падрыхтаваная бібліятэкарамі і настаўніцай беларускай мовы Надзеяй Уладзіміраўнай Радзевіч, адбылася ў сценах ДУА ”Лужкаўская сярэдняя школа Шаркаўшчынскага раёна“. Аматары мастацкага слова, для якіх паэзія не прафесійны занятак, а проста неад’емная частка жыцця, расказвалі аб сваёй творчасці, дзяліліся ўспамінамі і чыталі свае лепшыя вершы пра каханне, прыроду і любоў да роднай зямлі. У гэты дзень давялося сустрэцца і пазнаёміцца з таленавітай, прыемнай і душэўнай жанчынай Алінай Антонаўнай Шынкевіч. Яе паэтычная творчасць – шчырая, добрая, мудрая.
Лена Андрэеўна Гугалінская, працуе ў бібліятэцы і зносіны з кнігай, з мастацкім словам, з любімымі чытачамі і цікавымі творчымі людзьмі натхняюць на паэтычны лад, надаюць асобую творчую энергію. Як прызналася Лена Андрэеўна, у пошуках новага эмацыянальнага ўздыму яе творчая энергія перайшла ў другое не менш цікавае захапленне – пейзажную фотаздымку. Цікавым быў прагляд прэзентацыі ”Зноў родны край заве душою наталіцца…“ з гарманічным спалучэннем пейзажных фотаздымкаў родных мясцін і радкоў вершаў уласнага сачынення.
Маладая пачынаючая паэтка-аматарка Эмілія Красавіна, вучаніца 9 класа ДУА ”Лужкаўская сярэдняя школа Шаркаўшчынскага раёна“, актыўная ўдзельніца бібліятэчных мерапрыемстваў і адзін з лепшых дзіцячых чытачоў Лужкаўскай бібліятэкі, заваявала сімпатыю і захапленне слухачоў прыгажосцю, вялікай эмацыянальнай глыбінёй і выразнасцю дэкламавання сваіх вершаў пра каханне і сяброўства.
Напрыканцы сустрэчы ўдзячныя гледачы прыпаднеслі кветкі і невялікія сувеніры гасцям святочнай праграмы, а таксама пажаданні творчага натхнення, здароўя і радасці.
