АНАНІЧ ВЕРА ПЯТРОЎНА
Нарадзілася 25 красавіка 1927 года ў в. Рагоўскія Пастаўскага р-на. Да вайны скончыла 4 класы. У сям’і было пяцёра дзяцей, Вера Пятроўна была ў сям’і старэйшай дапамагала бацькам па гаспадарцы. У 1943 годзе ўся сям’я была вывезена ў Германію.
З успамінаў “Немцы прыйшлі рана раніцай і загадалі хутка збірацца пагрузілі ўсіх на падводы, на станцыі пагрузілі ў грузавыя вагоны і прывезлі ў г. Граева (Польшча) на мяжы з Германіяй, там памерла сястра Антаніна 1940 г. н, там яе і пахавалі. Перавезлі ў г. Мюнстер (Германія). Працавалі шмат, разбіралі завалы, капалі магілы, жылі ў бараках, кармілі вельмі дрэнна, плацілі трохі грошай, некаторыя немцы дапамагалі давалі ежы. У 1944 годзе нарадзілася сястра Галіна, на пачатку траўня нас паставілі ў калону і пагналі, так мы ішлі тры дні, з невялікімі перапынкамі многія не вытрымлівалі, сястра Галіна памерла. Калі пачаліся абстрэлы саюзнікамі-амерыканцамі немцы нас адпусцілі і сказалі, каб ішлі куды хочам. Як мы потым даведаліся нас гналі ў лагер смерці. Мы дайшлі да кінутай школы і ўпалі без сіл. Раніцай прыйшлі амерыканцы накармілі нас, з мая па жнівень мы жылі ў гэтай школе на беразе р. Эльба. У жніўні 1945 года вярнуліся на радзіму, на месцы нашай вёскі засталося папялішча, а ад нашага дома толькі комін. Прытулілі суседзі ў зямлянцы. Пасля вайны ўсёй сям’ёй будавалі новы дом. Наведвалі цётку ў в. Пятровічы пазнаёмілася з Ананіч Леанідам Рыгоравічам, завязалася сяброўства ў 1953 годзе выйшла замуж, у 1955 годзе нарадзілася дачка Ганна, у 1961 – сын Аляксандр. Працавала ў калгасе паляводам, вартаўніком, цялятніца.”
