Выязны семінар бібліятэкараў раёна
20 чэрвеня 2018 года адбыўся выязны семінар бібліятэкараў раёна на тэму “Бібліятэка для чытача: дыяпазон новых магчымасцяў у Год малой радзімы”. Былі наведаны Навасёлкаўская бібліятэка-філіял № 32 і Каўшэлеўская бібліятэка-філіял № 26.
Бібліятэкар Навасёлкаўскай бібліятэкі Марына Фёдарава правяла для калег літаратурнае падарожжа “Героі вясёлых дзіцячых кніг”, а дапамагалі ёй у гэтым дзве абаяльныя юныя чытачкі – Анастасія Дабравольская і Анастасія Буйка. Прысутныя пазнаёміліся з біяграфіяй і творчасцю дзіцячых пісьменнікаў: Міколы Чарняўскага, Янкі Маўра, Сяргея Міхалкова, Віктара Драгунскага, Мікалая Носава.
Бібліятэкар Каўшэлеўскай бібліятэкі Алена Мядзелец правяла аглядную эскурсію па ўстанове. Затым усе дружна крочылі ў размешчаны побач Каўшэлеўскі Дом фальклору, дзе адбылася літаратурна-музычная сустрэча “А я проста жанчына”. Галоўнай гераіняй сустрэчы стала Надзея Вайцюль, таленавітая пачынаючая паэтка, кіраўнік народнага фальклорнага гурта “Купалінка”, удзельніца народнага літаратурна-музычнага аб’яднання “Світанак”. На працягу сустрэчы гледачы падрабязна знаёміліся з біяграфіяй Надзеі, слухалі вершы і песні ў яе выкананні. Прагучала шмат цёплых слоў і музычных віншаванняў ад калег і сяброў.
У рамках выязнога семінара для бібліятэкараў раёна супрацоўнікі аддзела бібліятэчнага маркетынгу далі метадычныя парады па прыцягненню чытачоў да кнігі і чытання праз вулічныя формы масавай работы, па стварэнню старонак бібліятэк у сацыяльных сетках.
