Дарога жыцця Лазара з Лужкоў
У Шаркаўшчынскай раённай бібліятэцы адбылося краязнаўчае знаёмства, прысвечанае 160-годдзю з дня нараджэння Эліэзера Бэн-Іегуды (Лазара Перэльмана).
Эліэзер Бэн-Іегуда – наш зямляк, ураджэнец вёскі Лужкі, грамадскі дзеяч, мовазнаўца, адраджальнік іўрыта. Дзякуючы яму, адрадзілася мова яўрэйскага народа і стала дзяржаўнай мовай Ізраіля.
Пра асобу Эліэзера Бэн-Іегуды даведаліся вучні дзевятага класа СШ № 2. Разам з настаўніцай гісторыі СШ № 1 Аксанай Анатольеўнай Бабоўскай яны ўзгадалі некаторыя найбольш значныя моманты з жыцця нашага вядомага земляка і нават прадэманстравалі іх на сцэне як акцёры.
Юнакі і дзяўчаты з цікавасцю слухалі Аксану Анатольеўну, выконвалі розныя заданні, што дазволіла ім пазнаёміцца з дзяржаўнай мовай Ізраіля і даведацца пра найбольш цікавыя факты яе ўтварэння. І нават паразважалі наконт таго, што трэба зрабіць нам, каб пачаць размаўляць на роднай беларускай мове, якая, на жаль, не мае шырокага распаўсюджвання ў сучасным грамадстве.
