Водар чароўных яблыкаў
На радзіме славутага садавода-селекцыянера І.П.Сікоры, у вёсцы Алашкі, штогод праходзіць свята, прысвечанае яблыку.
У гэтым годзе Шаркаўшчынская цэнтральная раённая бібліятэка таксама прыняла ўдзел у свяце. Бібліятэчныя работнікі арганізавалі інтэрактыўную бібліятэчную пляцоўку пад назвай ”Водар чароўных яблыкаў“, наведвальнікі якой маглі пазнаёміцца з выставай літаратуры, на якой былі прадстаўлены матэрыялы пра Івана Паўлавіча Сікору, літаратурныя творы, распавядаючыя цікавыя яблычныя гісторыі і малавядомыя звесткі пра чароўны плод.
На выставе знайшлося месца і творам пісьменнікаў, у якіх вядзецца аповед аб тым , як даўней народ святкаваў Яблычны Спас.
Юныя наведвальнікі пляцоўкі з задавальненнем удзельнічалі ў квэст-гульні ”У пошуках маладзільных яблыкаў“. Для таго, каб здабыць маладзільныя яблыкі, ім прыйшлося прайсці праз розныя выпрабаванні: знайсці казкі, дзе ўзгадваецца яблык, разгадаць загадкі, а пры дапамозе ключа – і прыказкі пра Яблычны Спас і іншыя. Да спадобы прыйшлася хлопчыкам і дзяўчынкам гульня ў шашкі, у якой замест звычайных шашак выкарыстоўваліся чырвоныя і зялёныя яблыкі.
Пераможцы кожнага конкурсу прымацоўвалі намаляваны чырвоны яблык на яблыньку, а той, хто прымацаваў больш яблыкаў – атрымаў галоўны прыз.
