УЗОР ДЛЯ РОЗНЫХ ПАКАЛЕННЯЎ
У Германавіцкай бібліятэцы прайшла гутарка-дыялог ”Узор для розных пакаленняў“, прымеркаваная да 130-годдзя з дня нараджэння Браніслава Тарашкевіча.
Да мерапрыемства бібліятэкар падрыхтавала выставу літаратуры, на якой была прадстаўлена ”Беларуская граматыка для школ“ 1929 года і зборнік 2008 года, ”Правілы беларускай арфаграфіі і пунктуацыі“. Сярод матэрыялаў, змешчаных на выставе, знаходзіліся не толькі звесткі пра жыццё і дзейнасць Браніслава Тарашкевіча, але і іншых навукоўцаў-моваведаў: Яўхіма Карскага, Язэпа Лёсіка, Вацлава Ластоўскага, Фёдара Янкоўскага, Сцяпана Некрашэвіча, Анатоля Клышкі.
Бібліятэкар параўнала ”Беларускую граматыку для школ“ 1929 года з сучаснымі правіламі беларускай арфаграфіі і пунктуацыі і прыйшла да высновы: Браніслаў Тарашкевіч палажыў аснову нашай літаратурнай мове і даў ёй граматычнае афармленне і правапіс. Без гэтай граматычнай нармалізацыі не магла існаваць і развівацца беларуская літаратурная мова.
