СВЯТА ВОСЕНІ
Лужкаўская бібліятэка працягвае цікавую і карысную дзейнасць ў рамках комплекснай праграмы па рабоце з дашкольнікамі “Ад роднай мовы і культуры да чалавецтва крок зрабі”. На рахунку яе рэалізацыі мерапрыемствы гульнёва-пазнавальнага характару па розных тэмах і накірунках: экалагічныя і ашчадныя хвілінкі, завочныя гульні-экскурсіі і казачныя падарожжы, фальклорныя асарці і кніжныя ярмаркі, яшчэ шмат іншых забаўляльных момантаў і заняткаў, што спрыяюць развіццю цікавасці да чытання ў дзіцячым асяроддзі, фарміраванні светапогляду, эстэтычных пачуццяў, а таксама папулярызацыі лепшых твораў мастацкай дзіцячай літаратуры, культурных традыцый, народных святаў і абрадаў.
Напрыканцы кастрычніка для выхаванцаў Гарадзецкага яслі-сада адбылася чарговая цікавая сустрэча з забаўляльнымі конкурсамі, песнямі і танцамі, знаёмствам з вершамі і апавяданнямі, загадкамі і прыказкамі пра восень, яе месяцы і цудоўныя, смачныя дары сада і агарода ў гэты час. Свята восені “Весёлый капустник”, сумесна арганізаванае бібліятэкай і выхавацелямі дзіцячай установы, прынесла шмат прыемных эмоцый і пазнавальных момантаў для дзяцей і дарослых. У госці завіталі Баба Яга і Лесавік, каб паспаборнічаць з дзецьмі , паказаць веды ў адгадванні загадак і рэбусаў, спрыт і навыкі ў конкурсах “Хто хутчэй”, “Кулінар”, “Самы знаходлівы”.
Напрыканцы сустрэчы бібліятэкар скіравала ўвагу маленькіх чытачоў на кнігі, у якіх распавядаецца пра восень, восеньскія работы ў садзе і агародзе, звычкі жывёл і птушак у гэты перыяд года.
