Паэзія нам дорыць прыгажосць
Цудоўнай нагодай яшчэ раз пацешыць сваю душу і розум прыгажосцю вершаванага радка стала літаратурная імпрэза ”Паэзія нам дорыць прыгажосць“, якую падрыхтавалі супрацоўнікі цэнтральнай раённай бібліятэкі сумесна з народным калектывам літаратурнай творчасці ”Світанак“.
На пачатку мерапрыемства вядучыя адзначылі, што сакавік нездарма выбраны для імпрэзы выдатнага, рамантычнага Дня паэзіі, бо гэты месяц ўвасабляе пачатак вясны, адраджэнне і абуджэнне прыроды. Паэзія заўсёды стварае цудоўны настрой, новыя пачуцці і надзеі. Вершы як музыка, у кожнага знойдуць водгук. А яшчэ кожны верш – гэта погляд аўтара на свет, таму заўсёды можна знайсці той твор, які будзе адлюстроўваць сітуацыю, дапаможа знайсці адказы на свае пытанні. Дзякуючы паэзіі, мы можам глыбей адчуць паўнату жыцця з яго радасцямі і смуткамі.
Падчас мерапрыемства гучалі вершы паэтаў-землякоў: ”Душа паэта“ Міледзія Кукуця, ”Сила поэзии“ Надзеі Вайцюль, ”Нашы самародкі“ Людмілы Ардынскай.
Паэзія чароўна вабіць нас сваёй музычнай ласкавай формай, яркім натхняльным зместам і ў гэтым прысутныя яшчэ раз упэўніліся, паслухаўшы прэм’еру песні ”Яблынька“ на словы Святланы Клімзы, якую шчыра і прыгожа праспяваў аўтар музыкі – Іван Гарбачонак.
Кульмінацыйным момантам імпрэзы стала прэзентацыя новай кнігі пісьменніка-земляка Віктара Лагуна ”З дзён маіх адзін“.
Прэзентуючы ўдзельнікам мерапрыемства новую кнігу, В.І. Лагун зазначыў, што праца над стварэннем новай кнігі цягнулася не адзін год. Галоўныя героі мемуарна-гістарычнага выдання – работнікі электрасетак Шаркаўшчынскага раёна (аўтар прыгадвае звыш 300 імён і прозвішчаў). Віктар Ільіч распавёў аб сустрэчы з ветэранам-электрыкам Фёдарам Бондарам, дзякуючы ўспамінам якога паэт вершаванымі радкамі апісаў гістарычнае развіццё мястэчка, электрафікацыі і энергетыкі раёна.
Павіншаваць аўтара з выданнем кнігі прыйшло шмат аматараў паэзіі, сяброў-пісьменнікаў і яго калег.
