Фальклорнае свята ”Іван Купала: гісторыя, традыцыі і звычаі“
Адзін з самых рамантычных, таямнічых народных святаў – несумненна, Івана Купала. Гэта свята ў народзе называюць днём Івана Купалы або Іванавым днём і адзначаюць 7 ліпеня, пасля дня летняга сонцастаяння. Купалле – старажытнае абрадавае свята сонца і агню, божышчаў урадлівасці і росквіту зямлі. Падумайце толькі: адна ноч – а ўсе чатыры стыхіі яднае! Ваду, агонь, паветра ды зямлю. Уяўляеце, якія сілы прыродныя збіраюцца разам?
Супрацоўнікі аддзела абслугоўвання і інфармацыі цэнтральнай раённай бібліятэкі правялі фальклорнае свята ”Іван Купала: гісторыя, традыцыі і звычаі“. На маляўнічым беразе ракі Дзісна на мерапрыемства сабраліся ўдзельнікі аматарскага аб’яднання ”Душэўная утульнасць“. У пачатку мерапрыемства распачалі гаворку пра гісторыю ўзнікнення ”Купалля“, паведалі, адкуль пайшло гэтае свята, пазнаёмілі ўдзельнікаў з традыцыямі святкавання. Пляліся вянкі з палявых кветак, гучалі купальскія песні, легенды і паданні. Кульмінацыяй свята лічыцца пошук папараць-кветкі, якая зацвітае толькі ў купальскую ноч. Той, хто знойдзе чароўную папараць-кветку, атрымае шчасце і долю на ўсё жыццё. Заключным акордам свята прагучала песня ”Сягоння Купала, заўтра Ян…“.
